ОН ГАРСААР 91 ХҮН УСАНД АМИА АЛДЖЭЭ

Урин дулаан улирал үргэлжилж байгаатай холбогдуулан гол усны ойролцоо амрах хүмүүсийн тоо ихээр нэмэгддэг. Голын эрэг дээр тоглож буй бага насны хүүхдүүд эцэг, эхийн хараа хяналтгүйгээр өөрсдөө явж байгаад усанд осолдох тохиолдол элбэг байгааг албаныхан хэлж байна. Тодруулбал энэ он гарсаар золгүй байдлаар 91 хүн усанд осолдож амиа алдсан байна. Тэдний 13 нь бага насны хүүхэд байжээ.

Мөн усны золгүй ослоос гадна цаг уураас шалтгаалж, говь, хангай гэлтгүй хоромхон хугацаанд мөндөр, бороо орсон газарт үер болдог. Түүнчлэн хүчтэй салхилан айлын гэр унаж, мал, машин нь урссан ослын дуудлага онцгой байдлын албанд их ирж байгаа ажээ.

Одоогоор Архангай аймгийн урд хэсэг, Өвөрхангайн аймгийн хойд хэсгийн голууд үертэй тул тус нутгаар зорчихдоо иргэд анхаарал, болгоомжтой байхыг Онцгой байдлын ерөнхий газраас санууллаа.

Ю.Гэрэл