​​САЙДЫН "СУУДАЛТАЙ" ДҮЙХ ГАРЫН ҮСЭГ

МАН-ынхан Мэргэжлийн тодотголтой засгийн газраа унагахаар шийдэж, албан тушаалын тохиролцоо явагдаад эхэлчихсэн тухай чих дэлсэх боллоо. Одоогийн байдлаар УИХ-ын 22 гишүүн Засгийн газрыг огцруулах үндэслэл дээр гарын үсгээ зурсан байна. Баттай эх сурвалжийн мэдээлж буйгаар бол гарын үсэг зурсан гишүүдэд Ц.Нямдорж, Б.Энх-Амгалан Л.Энхболд М.Билэгт, Ж.Энхбаяр, Н.Учрал, Ч.Хүрэлбаатар, Д.Гантулга, Д.Сумьяабазар, Х.Болорчулуун, Х.Нямбаатар, Ц.Гарамжав, Л.Элдэв-Очир, М.Оюунчимэг, Г.Занданшатар, Ц.Даваасүрэн, Я.Содбаатар, Л.Энх-Амгалан, Д.Сарангэрэл, Л.Оюун-Эрдэнэ нар байгаа аж.

Үндсэн хуулийн 45.4-т зааснаар бол УИХ-ын гишүүдийн дөрөвний нэгээс доошгүй нь Засгийн газрыг огцруулах тухай саналыг албан ёсоор тавибал УИХ хэлэлцэн шийдвэрлэнэ гэж заасан байдаг. Тэгэхээр 19 гишүүн л Засгийн газрыг огцруулах саналыг дэмжсэн бол УИХ-аар хэлэлцүүлэх нөхцөл бүрддэг бөгөөд чуулганы хуралдаанаар гишүүдийн 51-ээс дээш хувь нь дэмжвэл саналыг нь хүлээн авах горимтой байдаг. Тодруулбал УИХ-ын 76 гишүүний 39 нь огцруулах асуудлыг дэмжвэл засаг унана гэсэн үг юм.

МАН-ын дотоодод өрнөж байгаа намын даргын суудлын төлөөх "зодоон" өнгөн дээрээ Ерөнхий сайд Ж.Эрдэнэбат, Шадар сайд У.Хүрэлсүх нарын хооронд өрнөж байгаа мэт харагдаж байгаа ч хөшигний ард фракц хоорондын сэм хуйвалдаан байгаа сураг байна. Тодруулбал Засгийн газрын хэрэг эрхлэх газрын дарга Ж.Мөнхбат, Сү.Батболд фракцаасаа Гадаад харилцааны сайдад Ц.Мөнх-Оргилыг зүтгүүлэхээр сэм хуйвалдсан гэх. Харин хотын фракциа намынхаа их хурал, бага хурал дээрээ унагаж чадахгүйгээ мэдсэн У.Хүрэлсүх УИХ-ын гишүүдтэй нэг нэгээр нь уулзаж сайдын суудал амлаж гарын үсэг зуруулж, хороо найруулж эхэлжээ. Ямартай ч У.Хүрэлсүх Ерөнхий сайд болбол хоёрдугаар ээлжинд "хоолонд орох" эзэд эхнээсээ тодроод эхэлсэн тухай улстөрийн хүрээнийхэн цайны хачир болгон ярьж байна. Тодруулбал, МАН-ын даргад Ж.Энхбаяр, УИХ-ын даргад Ц.Нямдорж, Монгол Улсын Шадар сайдад Б.Бат-Эрдэнэ, Сангийн сайдад УИХ Ц.Даваасүрэн, Ч.Хүрэлбаатар, Боловсролын сайдад Н.Учрал, Хөдөлмөр, нийгмийн хамгаалалын сайдад Л.Оюун-Эрдэнэ, Гадаад харилцааны сайдад Г.Занданшатар, Хүнс, хөдөө аж ахуй, хөнгөн үйлдвэрлэлийн сайдад Д.Сумьяабазар, Х.Болорчулуун, Хуульзүйн, дотоод хэргийн сайдад Х.Нямбаатар, Гадаад харилцааны сайдад Г.Занданшатар, Уул уурхайн сайдад Я.Содбаатар нар тохиролцсон гэх мэдээлэл байгаа юм.

Н.Цэндбат