ЗААСАН ХУГАЦААНД НӨХӨН СЭРГЭЭЛТ ХИЙГЭЭГҮЙ АЖ АХУЙН НЭГЖИЙГ ТОРГОНО

Нийслэлийн нутаг дэвсгэрт түгээмэл тархацтай ашигт малтмалын тусгай зөвшөөрөл эзэмшигч аж ахуйн нэгж, байгууллагууд олборлолт явуулсан талбайгаа нөхөн сэргээхгүй байна гэсэн гомдол, мэдээлэл Мэргэжлийн хяналтын ерөнхий газар цөөнгүй ирдэг.

Үүнтэй холбогдуулан нийслэлийн Мэргэжлийн хяналтын болон Байгаль орчны газрынхан өнгөрсөн дөрөв, тав, зургадугаар сард 142 аж ахуйн нэгжийн үйл ажиллагааг шалгаж, шаардлага хүргүүлжээ. Албан шаардлагын хугацаанд буюу хоёр сарын дотор ердөө 19 аж ахуйн нэгж үүргээ биелүүлсэн аж.

Тодруулбал, Хан-Уул, Налайх дүүрэгт үйл ажиллагаа явуулдаг 19 аж ахуйн нэгж 45.5 га талбайд техникийн болон биологийн нөхөн сэргээлт хийсэн байна. "Заасан хугацаанд нөхөн сэргээлт хийгээгүй аж ахуйн нэгжүүдэд түгээмэл тархацтай ашигт малтмалын тухай хуулийн дагуу арга хэмжээ авна" гэж нийслэлийн Байгаль орчны газрын Хүрээлэн буй орчин, байгалийн нөөцийн удирдлагын хэлтсийн дарга Б.Болортуяа ярилаа.

Түгээмэл тархацтай ашигт малтмалын тухай хуулийг 2014 оноос аймаг, нийслэлийн Засаг дарга нар нутаг дэвсгэртээ хэрэгжүүлж эхэлсэн. Барилгын материалын үндсэн түүхий эд болох хайрга, тоосгоны шавар, хүрмэн боржинг байгаль орчинд халгүй аргаар олборлохыг аж ахуйн нэгжүүдэд Нийслэлийн онцгой байдлын газраас анхааруулж байна.

Ю.Гэрэл