ШАР ЖОЛООНЫ ҮНЭМЛЭХЭЭР ХӨДӨЛГӨӨНД ОРОЛЦОЖ БОЛНО

Жолооны үнэмлэх хэвлэхтэй холбоотой асуудал жил бүр гардаг. Энэ жилийн хувьд ч мөн жолооны үнэмлэх шинээр хэвлэх асуудал гацаанд ороод байна. Жил бүр улсын төсөвт суугдсан санхүүжилтээр нээлттэй тендер зарлаж шалгарсан компанитай гэрээ байгуулан жолооны үнэмлэх хэвлэх ажил явагддаг.

Тус нээлттэй тендерийг Төрийн өмчийн бодлого зохицуулалтын газраас зарлаж, өнгөрсөн тавдугаар сарын 03-ны өдөр нээсэн. Гэвч тендер шалгаруулалтад таван аж ахуй нэгж байгууллага материалаа ирүүлсэн боловч шаардлага хангасан компани шалгараагүй байна. Тиймээс нээлттэй тендерийг үнэлгээний хороо дахин зарлах шийдвэр гаргажээ.

Одоогоор жолооны үнэмлэх нөхөн авах, солиулах, шинээр жолооч болсон, ангилал ахиулах 60 орчим мянган иргэдийн материал иржээ. Иргэдийн хүсэлтийг шалгаж үзээд, Хууль зүйн сайдын 2015 оны А/189 дүгээр тушаалаар баталсан Монгол улсад хүчин төгөлдөр үйлчлэх "Жолоочийн түр зөвшөөрөл"-ийг олгож эхэлсэн байна.

Нээлттэй тендер шалгаруулалт хуулийн хугацаандаа дахин зохион байгуулагдаж жолооны үнэмлэхний бэлдэц, хор дагалдах хэрэгсэл нийлүүлэлт ирэх аравдугаар сараас хэвийн болох аж. Тиймээс жолоочийн түр зөвшөөрөл, үнэмлэх солиулахаар материал бүрдүүлсэн иргэд хуучин шар жолооны үнэмлэхээр хөдөлгөөнд оролцох боломжтойг Цагдаагийн ерөнхий газрын Бүртгэл хяналтын төвөөс мэдээллээ.

Ю.Нямгэрэл