​200 ОРЧИМ ХОХИРСОН АЙЛ ӨРХИЙГ "ТҮР СУУРЬШУУЛАХ СУУЦ"-НД ОРУУЛААД БАЙНА

Нийслэл Улаанбаатар хотын хувьд тулгамдсан асуудлын нэг нь яах аргагүй гэр хорооллын дахин төлөвлөлт. Өмнөх жилүүдэд гэр хорооллыг дахин төлөвлөх төсөл яригдаж, иргэдийн хашаа байшинг байраар солих ажил эхэлсэн ч хол яваагүй, иргэдийг хохироох, чирэгдүүлэх асуудал нэлээд гарсан. Нийслэлээс энэ жил иргэдийн газрыг орон сууцаар солих, Сервис центр буюу инженерийн дэд бүтцийн төвийг байгуулах ажил хийгдэж байгаа юм. Тэгвэл өмнөх жилүүдэд хохирсон иргэдийн асуудлыг хэрхэн шийдвэрлэж байгаа талаар Гэр хорооллын дэд бүтцийн газрын Тамгын газрын дарга Б.Азжаргал ийнхүү ярьжээ. Тэрбээр "Төрийн ажил залгамж халаатай байдаг учраас өмнөх дахин төлөвлөлтийн ажлыг нээлттэй дахин төлөвлөлт хэлбэрээр үргэлжлүүлэн явуулж, дахин иргэдийг хохироохгүй, хүндрэл чирэгдэл учруулахгүй байх тал дээр анхааран ажиллаж байна. Ингэснээр төсөл хэрэгжүүлэгч байгууллагуудад барилга угсралтын ажлаа саадгүй хийхэд дөхөм болно. НЗДТГ болон НГХДБГ-ын зүгээс "Түр суурьшуулах сууц"-нд одоогийн байдлаар 200 орчим хохирсон айл өрхийг оруулаад байна. Төсөл хэрэгжүүлэгч компаниудад гэрээний дагуу үлдсэн айл өрхүүдийн түрээсийн төлбөрийг төлж, асуудлыг шийдвэрлүүлэх тал дээр шаардлага тавиад явж байна. Гол нь иргэдийн асуудлыг түр байдлаар биш барилга угасралтын ажлыг нь түргэвчлүүлэх иргэдийг байранд нь оруулах тал дээр анхаарч шаардаж ажиллаж байна" хэмээв.

Б.Ирээдүй