Ц.САНДУЙ, С.БАТБОЛД НАРТ МЭДЭГДЭЛ ХҮРГҮҮЛЖЭЭ

Монголын архитекторуудын эвлэлийн удирдах зөвлөлөөс НИТХ-ын дарга Ц.Сандуй, Нийслэлийн засаг дарга бөгөөд Улаанбаатар хотын захирагч С.Батболд нарт мэдэгдэл хүргүүлжээ. Уг мэдэгдэлдээ "Сүхбаатар дүүргийн 4 дүгээр хороо, Хичээнгүй сайд Б.Цэрэндоржийн гудамжны цэцэрлэгт талбай бол Нийслэл Улаанбаатар хотын иргэдийн сэтгэл зүрхэнд хоногшсон, өнгө төрөхөө олсон архитектур, орон зайн зөв шийдэлтэй, тохижилттой бульвар буюу олон нийтийн зориулалттай,түүхэн гудамж билээ.

Нийслэлийн засаг дарга асан Э.Бат-Үүл 2016 оны 6 дугаар сарын 20 -ны өдөр А/501 тоот захирамж гарган уг гудамжинд "Автомашингүй гудамж" төслийн хүрээнд газар доорхи худалдаа үйлчилгээний 2 давхар байгууламж барихаар 17000 кв.м газрыг олгосон байна. Үүнээс үүдэн оршин суугчид, иргэдийн амгалан тайван байдлыг алдагдуулж, хотын түүхэн гудамжны өнгө үзэмж, зориулалтыг өөрчлөх, нийслэлийн иргэдийн өмчийг луйвардах ажил эхэлсэнд харамсаж Монголын Архитекторуудын Эвлэлээс мэдэгдэл гаргахад хүргэлээ.

Нийслэлийг 2012-2016 онд удирдсан дарга нар Улаанбаатар хотын архитектурын дурсгалт байгууламж, хөшөө дурсгал, улс орны түүхийг хадгалсан түүхэн барилгуудыг устгах, газрыг нь өндөр үнээр худалдах ажлыг эрчимжүүлж, эцэст нь түүхт гудамжаар нь устгах, соёлт хүн төрөлхтөнд баймааргүй балмад үйл ажиллагааг зохион байгуулсаныг Монголын архитекторууд эрс эсэргүүцэж, энэ балмад, зальт үйл ажиллагааг нэн даруй зогсоож, иргэд оршин суугчдын эсэргүүцлийг хүлээн авч, НЗД-ын А/501 тоот захирамжийг хүчингүй болгон,уг гудамжийг яаралтай сэргээн засаж, хуучин өнгө төрхийг нь сайжруулах шийдвэр гаргахыг Та бүгдээс шаардаж байна.

"Автомашингүй гудамж" гэх төслийн нэр барьж, иргэдийг уран үгээр хуурч, худалдааны 2 давхар (магадгүй зураг төслийг зөрчин олон давхар) барилга байгууламжийг барих ажлыг санаачилж, хэрэгжүүлэгчид нь хотын оршин суугчид, иргэдийн саналыг огт авалгүй, хот төлөвлөлтийн холбогдох хуулиуд, норм дүрмүүд

болон УИХ-аар батлагдсан Улаанбаатар хотыг 2020 он хүртэл хөгжүүлэх ерөнхий төлөвлөгөөний тодотголын хот төлөвлөлтийн бүсчлэлийн шаардлагад зөвшөөрөгдөх ашиглалтын үйл ажиллагааны чиглэлийг зөрчсөн, НИТХ-ын тогтоолуудыг зөрчсөн, БХБЯ-ны Архитектур, хот байгуулалтын мэргэжлийн зөвлөлөөр хэлэлцүүлээгүй, зөвлөмж, дүгнэлт гаргуулаагүйгээр дээрхи хууль бус шийдвэрийг гарган нийслэлийн иргэдийн өмчид халдсан, нийтийн эзэмшлийн газрыг луйвардсан үйл ажиллагаа гэж үзэж байна.

Өнгөрсөн жилүүдэд хотын удирдлага хоноцын сэтгэлээр хандаж, гадныханы гар хөл болж иргэдийг уран үгээр хуурч,үнэ цэнэтэй, үүх түүхтэй болгоныг нь устгасан, мэргэжлийн байгууллага, хүмүүсийн үгийг үл тоож ихээхэн гай учруулсан.

Тухайлбал. Түүхт хаалгануудыг нураасан, Сүхбаатарын талбайг өөрчилж, Хүүхдийн урлан бүтээх төвийн барилгыг буулган газрыг зарахаар, авахаар санаархсан, НЗД-ын тамгын газрын барилгыг (Түүхэн барилгыг хамгаалах жагсаалтанд орсон) худалдсан, хувьчилсан гээд устгасан зүйл их.

"Барилгачдын талбай" өнөөдөр өнгө үзэмжгүй (сүнсгүй) "Хогийн талбай" болсон, Ялалтын талбайн усан оргилуурыг устган өндөр барилга барьсан, "Хүнсний-20" дэлгүүрийн өмнөх нүхэн гарцыг хувьчилж "Үйлчилгээ" болгосноор шөнө нь цоожтой хогийн сав болгож, нийтийн эзэмшлийн зам талбайг иргэдээс булаан авсан гашуун туршлагыг өнөөдөр давтаж дахин нэг "Хогийн гудамж" үүсгэх гэж байгааг анхааруулж байна.

Энэ ажлыг гүйцэтгэх "Монголын барилгын үндэсний ассоциаци" нь ёс зүйтэй хандаж уг ажлаас татгалзах, үнэхээр томоохон худалдааны төвийг иргэдийн төлөө өөрсдийн хөрөнгөөр барих хүсэлтэй байгаа бол хотын дэд төвүүдэд болон дагуул хотуудад барьж байгуулахыг уриалж байна.

Нийгэмд хор учруулах, хууль бус үйл ажиллагаанд эх загвар зураг,зураг төслийн ажлаар оролцсон, ёс зүйн дүрмийг зөрчсөн архитекторууд, зураг төслийн байгууллагуудад холбогдох арга хэмжээ авах нь зүйтэй гэж үзэж байна.

МОНГОЛЫН АРХИТЕКТОРУУДЫН ЭВЛЭЛИЙН УДИРДАХ ЗӨВЛӨЛ, МОНГОЛЫН АРХИТЕКТУР, ХОТ ЗӨЛӨВЛӨЛТИЙН МЭРГЭЖЛИЙН ЗӨВЛӨЛ, Улаанбаатар хот, 2017.08.07" гэжээ.

Б.Ирээдүй