​ЖАРГАЛАНТ, АМГАЛАНБААТАР ГЭСЭН ХОЁР ДҮҮРЭГ НЭМЭГДЭХ БОЛОЛТОЙ

Хамгийн олон хүн амтай гэгдэх Баянзүрх, Сонгинохайрхан дүүргийн иргэдийг хоёр хуваан шинээр дүүрэг нэмэх тухай асуудал яригдаж байна. Нийслэл хотын Засаг дарга С.Батболд саяхан дээрх хоёр дүүргийг хуваах асуудлыг судлах ажлын хэсгийг байгуулсан аж. Ажлын хэсэг судалгаагаа хийж дуусгажээ. Дүүргүүдийг хүн амын байдлаар нь авч үзвэл Сүхбаатар дүүрэг 136 мянга, Хан-Уул дүүрэг 159 мянга, Чингэлтэй дүүрэг 160 мянга, Налайх 38 мянга, Багахангай 4200, Багануур 29 мянга, Баянгол дүүрэг 214 мянган хүн амтай байсан бол Баянзүрх дүүрэг 345 мянга, Сонгинохайрхан дүүрэг 360 мянган хүн амтай байсан байна. Тиймээс ажлын хэсгийнхэн 380 мянган хүн амтай СХД-ийг 180 мянга, 160 мянгаар нь хоёр хэсэгт бүсчлэн хувааж, нэг хэсгийг нь Жаргалант дүүрэг гэж нэрлэхээр санал гаргаад байгаа бол Баянзүрх дүүргээс хуваагдсан хүн амаа оршин суугаа хэсгийг Амгаланбаатар дүүрэг гэж нэрлэхээр яригдаж байгаа аж.