​ЗАЛРУУЛГА

Зариг.мн вэб сайт нь 2017 оны наймдугаар сарын 01-ны өдөр "Үндсэн хуулийн цэцийн гишүүн Н.Жанцан 4 тэрбумын хадгаламжтай" гэсэн гарчигтай мэдээллийг нийтлэсэн билээ. Энэхүү мэдээллийг нийтлэхдээ нягталж шалгалгүй, хайхрамжгүй хандсаны улмаас алдаа гаргаж, их хэмжээний хадгаламжтай мэтээр ташаарч, олон нийтэд буруу ойлголт өгсөн алдаа гаргалаа.

Үндсэн хуулийн цэцийн гишүүдийн ХОМ-ээс жилийн орлого, хадгаламжийн хэмжээг мэдээллэхдээ цэцийн гишүүн Н.Жанцангийн хадгаламжийн хэмжээ 475019,68 төгрөг байсныг 4 тэрбум хэмээн бичиж, түүнийгээ нягталж, шалгалгүй нийтэлж, тухайн хүний нэр хүндэд халдсан байна. Тиймээс Хэвлэл мэдээллийн ёс зүйн зарчмын 1.9-т зааснаар "Нийтлэж, нэвтрүүлсэн мэдээлэл нь ташаа болох нь тогтоогдсон мэдээллийг нэн даруй залруулна" гэсний дагуу уншигч та бүхэнд залруулга хүргэж байна.

Ажилдаа хариуцлагагүй хандаж, бэлтгэсэн мэдээ мэдээллээ нягталж шалгаагүй сэтгүүлчид хариуцлага тооцсон болохыг үүгээр мэдэгдэж байна.

Мөн их хэмжээний хадгаламжтай мэтээр буруу мэдээлэл олон нийтэд хүргэсэн явдалдаа Үндсэн хуулийн Цэцийн гишүүн Н.Жанцангаас уучлалт хүсье.

Дахин ийм алдаа гаргахгүй гэдгээ уншигчиддаа амлаж байна.