​ДОРНОГОВЬ АЙМГИЙН ЗАЛУУЧУУД НУТГИЙН УДИРДЛАГУУДДАА ХАНДЖЭЭ

Ирэх жил ноён хутагт Дулдуйтын Данзанравжаагийн мэндэлсний 215 жилийн ой тохиох юм байна.

Дорноговь аймгийн удирдлагууддаа хандах нь:

Ирэх жил ноён хутагт Дулдуйтын Данзанравжаагийн мэндэлсний 215 жилийн ой тохионо. Дорноговьчуудын хувьд эрчүүд нь морьдоо эмэгтэйчүүд нь дээлээ зэхэж, бөхчүүд нь бэлтгэлээ базааж, хүсэн хүлээдэг тэмдэглэлт баяр. Энэ ойг ёслол төгөлдөр тэмдэглэх ажлыг орон нутгийн удирдлагууд өндөр түвшинд зохион байгуулах нь ойлгомжтой. Том ой гэдэг утгаараа бөхийн барилдаан нээлттэй аварга арслангууд оролцсон нилээн томоохон барилдаан болох нь дамжиггүй. Тиймээс аймгийн цол олгох барилдааныг тусад нь нутгийн бөхчүүдийнхээ дунд зохион байгуулах нь зөв боловуу.
Иймд аймгийн удирдлагууддаа хандан дараах саналыг оруулж байна.
1. Бөхийн спорт үндсэндээ залуу хүний спорт. Тиймээс Дорноговь аймгийн залуучуудын холбоо төрийн болон төрийн бус холбогдох байгууллагуудтай хамтран дээрх цол олгох барилдааныг зохион байгуулах
2. Дорноговь нутгийн 256 шижигнэсэн залуусаар бүрдсэн барилдаан болгоно. Сумдын залуучуудын холбоогоороо дамжуулан сум аймгийн цолтонгууд бөх сонирхогчдыг эртнээс бэлтгэлийг нь хангуулан оролцуулна
3. Нутгийн бөхчүүдийн цолны эрэмбийг он дарааллаар нь гаргаж, холбогдох эрх бүхий байгууллагаар батлуулна. Программчилж бас болно. Ингэснээр оноолт будлиангүй болно.
4. Монгол бөхийн жаяг ёс дэг уламжлалыг бүрэн мөрдөж, бөхийн хөлийн цэц, засуул, бөхчүүдийн ёс зүйн дүрмийг чанд мөрдүүлж ажиллана. Наадамчин олноо үл хүндэтгэсэн ёс бус үйлдлийг тухай бүрт нь таслан зогсооно.
5. Зохион байгуулах хөтөлбөр төлөвлөгөөг маш нарийн гаргаж, аймгийн удирдлагуудаар батлуулан чанд мөрдөн ажиллана.
Жич: Дорноговь аймгийн Залуучуудын холбоо нь төрийн байгууллага, бөхийн холбоотой шууд хамтран ажиллах бүрэн боломжтойн дээр хамтран ажилласан бүрэн туршлагатай. Төрийн зарим чиг үүргийг төрийн бус байгууллагаар гүйцэтгүүлж болно гэх зарчмаар ажиллах боломжтой. Улс төр, мөнгө, эрх ашгийн ямар ч сонирхолд автахгүйгээр хамтран зохион байгуулна.
Уг хүсэлтээ бид албан бичгээр мөн илгээнэ.
Хэрвээ та бүхэн боломжтой гэж үзвэл ирэх оны эхнээс бэлтгэл ажлаа базааж, наадмын үед бүрэн хангасан байх боломжтой.
Мөн энэ жилийн наадам бай шагнал өндөртэй, үндэсний бөхөөс бусад үйл ажиллагаа өндөр зохион байгуулалттай байсан гэдгийг онцлон талархал илэрхийлье.

Та бүхэн зөвшөөрвөл бид хамтран ажиллахад таатай байх болно.
Бид энэ нутагт төрж өсч өндийсөн залуу хүмүүсийн хувьд аймаг орон нутгийн хөгжил дэвшил сайн сайхны төлөө ямар ч эрх ашиг сонирхлын зөрчилд баригдахүйгээр ажиллана.
Дорноговь аймгийн Залуучуудын холбоо" гэжээ.