ОУВС, ЗАСГИЙН ГАЗРЫГ АМЖИЛТТАЙ АЖИЛЛАА ГЭЖ ДҮГНЭЛЭЭ

Монгол Улсын Ерөнхий сайд Ж.Эрдэнэбат өнөөдөр Олон Улсын Валютын сангийн ажлын хэсгийн ахлагч Коши Матайг хүлээн авч уулзлаа. Ажлын хэсэг нь Монгол Улсын ОУВС-тай хамтран хэрэгжүүлж байгаа Өргөтгөсөн санхүүжилтийн хөтөлбөрийн эхний үнэлгээг хийхээр Монгол улсад ажиллав.

Хөтөлбөрийн хүрээнд авч хэрэгжүүлэх нэн тэргүүний бодлогын арга хэмжээг цаг хугацаанд нь амжилттай хэрэгжүүлж, хөтөлбөрийн эхний шатанд хүрэх ёстой үр дүнд хүрсэн байгаа тул эхний шатны үнэлгээг АМЖИЛТТАЙ хэрэгжүүлсэн гэж дүгнэх боломжтой боллоо.

Хэдийгээр эдийн засгийн өсөлт бий болж байгаа ч, эмзэг хэвээр байгааг анхаарч цаашид өсөлтийг баталгаажуулах, тогтвортой байлгахын тулд Засгийн газар тууштай ажиллаж, шинэтгэлийг үргэлжлүүлэх нь чухал байгааг онцоллоо.

Эдийн засагт тулсан байсан эрсдлийг хазаарлан, эдийн засгаа сэргээх замд орсноор Засгийн газар үйлдвэржилт, дэд бүтэц, экспорт, хөгжлийн төсөл арга хэмжээг хэрэгжүүлэх боломжийг олгож байгааг Ерөнхий сайд Ж. Эрдэнэбат дурьдлаа. Цаашид хөтөлбөрийг амжилттай хэрэгжүүлж, улс орныг хямралаас гаргахын тулд Монгол Улсын Засгийн газар хүчин чармайлт гарган ажиллах болно гэлээ.