Б.БАЯНДЭЛГЭР: ОЛОН ЧАДВАРЛАГ СЭХЭЭТНҮҮДЭЭ ГУДАМЖИНД АЛХУУЛЖ БАЙНА

МАН дотооддоо нэлээд зөрчилтэй байгаа нь тус намын бага хурлын гишүүдийн сүүлийн үед хэвлэлээр байр сууриа илэрхийж буй байдлаас тодорхой харагдаж байна. Тухайлбал, МАН-ын Бага хурлын гишүүн Нийслэлийн ИТХ-ын төлөөлөгч асан Б.Баяндэлгэр намынхаа ялагдлын талаар ийнхүү ярьжээ.

Тэрбээр "Албан татвар нэмэгдүүлэх, тэтгэврийн насыг сунгах, хүүхдийн мөнгийг алагчлан олгох гээд л ард түмнийгээ сөхрүүлж,амийг нь таслах гээд байгаа юм шиг засгийн газрын шийдвэрүүдийг хэн дэмжих билээ дээ. Ард түмнийхээ амьдралаас хэтэрхий холдсон байна. Ер нь өнөөдрийн Монгол АРДЫН Намын удирдлагууд энэ намыг Монголын Хөрөнгөтний Нам болгож байна.

Олон чадварлаг сэхээтнүүдээ гудамжинд алхуулж байгаад энэ олон түмэн чинь дургүйцэж л байгаа шүү дээ. Тэд албан тушаалын наймаанд орж 60 тэрбумыг нь босголцож чадахгүйгээс ажилгүй байгаа. Оронд нь чадваргүй, төрийн мөнгөөр хөлжих зорилготой хөндлөнгийн хөрөнгөтнүүд төрийн албыг хашиж байгаа нэрээр дампууруулж байна. Ард түмний сонголтыг буруутгах аргагүй.

2016 онд ард түмэн биднийг 65 гишүүнтэй болгож тултал нь дэмжиж байсан бол ганцхан жилийн дараа манай намыг алгадаад унагаж байна. Энэ нэг жилийн дотор дарга удирдлагууд сонгогчидруугаа "бөгсөө харуулсны шинж". Үүнийгээ тэд хүлээн зөвшөөрөх хэрэгтэй.

Мөн ялагдлын бас нэг том шалтгаан бол албан тушаалын наймаа 60 тэрбумын асуудал. Ц.Сандуй "бичлэг алдагдсан" гэж хүлээн зөвшөөрөө биз дээ. 60 тэрбумынхан өөр хоорондоо орон гаран юм ярьж байхын оронд үг дуугуй огцроод зайлах нь улс эх орон болоод Намын эрх ашигт нийцнэ. Ард түмэн маань тэнэгүүд биш л дээ хө.Үнэхээр тэд гэмээ ухаарч, шударгаар буруугаа хүлээж, алдаагаа засч ажиллах юм бол тэртэй тэргүй хамт олон нь эгнээндээ эргүүлэн багтаах цаг хугацаа, боломж бий" гэжээ.

Б.Ирээдүй