СОГТУУГААР БУСДЫН АМЬ НАСАНД ХАЛДЖЭЭ

Цагдаагийн байгууллага энэ сарын 27-ны үүрийн 05 цагаас 28-ны өдрийн 05 цаг хүртэлх хугацаанд нийт 1634 гэмт хэрэг, зөрчлийн мэдээллийг шалгасан байна. Ийнхүү шалгахад гэмт хэргийн 86, зөрчлийн 1275, согтуугийн 311, зам тээврийн ослын 273 хэрэг, зөрчил бүртгэгджээ.

Тухайлбал, Баянзүрх дүүргийн 12-р хорооны "Жанжины ... тоотод нэгнийхээ амь насанд халдлаа" гэсэн мэдээлэл энэ сарын 27-ны өдөр цагдаагийн байгууллагад ирсэн байна. Мэдээллийн дагуу шалгахад Сонгинохайрхан дүүргийн 26-р хороонд оршин суух эрэгтэй 34 настай Е –г Баянзүрх дүүргийн 12-р хороонд оршин суух эрэгтэй 38 настай Б нь согтууруулах төрлийн ундаа хэрэглэсэн үедээ зодож, амь насыг нь хохироожээ. Цагдаагийн алба хаагчид гэмт этгээдийг шуурхай эрэн сурвалжилж баривчлан Баянзүрх дүүргийн цагдаагийн гуравдугаар хэлтэс эрүүгийн хэрэг үүсгэн шалгаж байгаа аж.

Мөн "ГССҮТ-ийн Түлэнхийн тасагт халуун тогоонд түлэгдсэн хүүхэд хүргэгдэн ирж хэвтлээ" гэсэн мэдээлэл Мэдээлэл шуурхай удирдлагын төвд иржээ. Мэдээллийн дагуу шалгахад Сүхбаатар дүүргийн 12-р хороонд оршин суух эрэгтэй хоёр настай Г нь долдугаар сарын 27-ны 18:30 цагийн үед буцалж байсан тогоотой шөлөнд унаж хүндээр түлэгдэн тус эмнэлэгт хүргэгдэн эмчлүүлж байгаа хэргийг тус дүүргийн цагдаагийн хэлтэст шалгаж эхэлжээ.

Харин орон нутгийн хувьд Сэлэнгэ аймгийн Орхон сумын нутаг Орхон голын гүүр орчимд Баянгол дүүргийн дөрөвдүгээр хороонд оршин суугч эрэгтэй 17 настай Б усанд орж байгаад живж амь насаа алдсан харамсалтай хэрэг гарсан байна байна.

Мөн Хөвсгөл аймгийн Мөрөн сумаас Тосонцэнгэл сумын чиглэлд явсан УАЗ-469 автомашин онхолдож жолооч амь насаа алдсан байна. Харин Өвөрхангай аймгийн Хархорин сумын Онгоц-Ухаа багаас гурван км зайд "Тоyota Vista" автомашин "Мустанг-5" улсын дугааргүй мотоцикольтой мөргөлдөж, жолооч тус сумын харъят эрэгтэй 37 настай А нь нас баржээ.