​Ч.САНЖААДАМБА: БӨХИЙН ХОЛБООНЫ ТАЙЛБАРААС ХАМААРЧ БИ БАЙР СУУРИА ИЛЭРХИЙЛНЭ

Баяр наадмын хүчит бөхийн барилдааны тавын даваанд аварга Ч.Санжаадамба аймгийн арслан Г.Ганжадыг амлан авч барилдсан боловч, зэрэг шахуу унасан юм. Энэхүү үйл явдлыг хөлийн цэц арслан Г.Ганжадын талд шийдвэрлэснээр маргаан үүсч, олон нийт болон Ч.Санжаадамба аварга хөлийн цэцийг шударга бус шийдвэр гаргасан гэж үзэж буй. Энэхүү маргаантай асуудлыг Монголын бөхийн холбоо хэрхэн шийдвэрлэж байгаа талаар бид өмнө нь тодруулахаар очсон боловч бөхийн холбоо амарсан, хариулт өгөх хүн байгаагүй юм.

Харин өнөөдөр Ч.Санжаадамба аваргатай холбогдсон боловч, дараах хариултыг өгсөн юм.

-Аварга аа сайн байна уу. Та хаагуур байна. Таниас ярилцлага авч болох уу?

-Би хөдөө орон нутагт, аймгийн наадмуудаар барилдаад явж байна. Наадам дуусахаар хот руу орно доо.

-Та ярилцлага өгөх бодолтой байна уу?

-Над руу маш олон хэвлэлээс хандаж байна. Та нар надаас ярилцлага авахын оронд Монголын бөхийн холбооноос ярилцлага ав. Би тэр буруу шийдвэрийг гаргаагүй. Харин Монголын бөхийн холбоо буруу шийдвэр гаргасан шүү дээ. Бөхийн холбоо ямар байр суурь илэрхийлэхээс хамаарч би байр сууриа илэрхийлнэ.

-Та гомдол гаргах уу?

-Үгүй.

Ө.Цэцэг