МАН-ЫН ГИШҮҮД НАМ ДОТОРХ ХУЙВАЛДААНЫГ ЭСЭРГҮҮЦЭВ

МАН-ын залуус үе үе шинэчлэлийн тухай дуугараад таг болдог. Ямартай ч Ерөнхийлөгчийн сонгуулиар 60 тэрбум, хүчингийн хэрэг гэх мэт намын нэр хүндийг нийгэмд унагасан нэлээдгүй мэдээ мэдээлэл түгсэн. "Хас"-ын Д.Ганхуяг намаа шинэчлэгдэх ёстойг сүүлийн үед нэлээд ярих болсон.

Үүний араас УИХ-ын гишүүн, МАН-ын Шинэчлэл, хөгжлийн хорооны дарга Т.Аюурсайхан, УИХ-ын гишүүн Л.Оюун-Эрдэнэ, Ж.Энхбаяр нар нь болон МАН-ын гишүүд "60 тэрбумаас намаа цэвэрлэе" хөдөлгөөнийг байгуулаад байгаа юм.

Тэгвэл өчигдрөөс эхлэн Нийслэлийн МАН-ын хорооны дэд дарга М.Ганбаатар тэргүүтэй гишүүд "60 тэрбум"-ын эсрэг 24 цагийн суултыг эхлүүлсэн байна. МАН-ын гишүүд албан тушаалыг наймаалцаж, 60 тэрбум төгрөг босгох хуйвалдаан зохион байгуулсныг эсэргүүцэж, намаа цэвэрлэх, шинэчлэх шаардлагатай гэж үзэж буй аж.