ТАМГЫН ГАЗРЫН ДАРГА НЬ ЕРӨНХИЙЛӨГЧИЙН ЭРХИЙГ ЭДЭЛСЭЭР БАЙХ УУ

Зөвлөлдөх санал зөвхөн Ерөнхийлөгчид л байна. Түүнээс Ерөнхийлөгчийн тамгын газрын дарга ерөнхийлөгчийг төлөөлөхгүй. Харин ерөнхийлөгчийн ажлыг зохион байгуулах үүрэгтэй гэдгийг З.Энхболд дарга мэдэхгүй байна гэдэг хачирхалтай.

С.Баяр, М.Энхсайхан нарыг эргүүлэн татах асуудлыг УИХ-аар зөвшилцөх тухай албан бичгийг Ерөнхийлөгчийн тамгын газрын дарга З.Энхболдын гарын үсэгтэйгээр УИХ-ын дарга М.Энхболдод илгээсэн билээ. Тэгвэл энэ асуудлаар Ерөнхийлөгч өөрийн гарын үсэг бүхий албан бичгийг явуулах ёстой гэх утга бүхий албан бичгийг УИХ-ын тамгын газраас З.Энхболдод буцаасан байна.

Харин ийнхүү буцаасан явдлыг Ерөнхийлөгчийн тамгын газрын дарга З.Энхболд улс төржүүлж "С.Баяр, М.Энхсайхан нарыг эгүүлэн татахыг УИХ-ын ТГ-ын дарга зөвшөөрөхгүй гэнэ. Өөрийн чинь ишэлсэн Үндсэн хуулинд ЗГ-аас зөвшөөрөл авах тухай алга. Үндсэн хуулинд байхгүй заалтаар ЗГ-тай зөвшилцвөл Үндсэн хууль зөрчсөн гээд огцорно биз дээ.
Монголын түүхэнд анх удаа Ерөнхийлөгч элчин сайдыг эгүүлэн татна гээд, УИХ, ЗГ нь үгүй гэдэг тохиолдол үүслээ. Ийм тохиолдолд Үндсэн хуулийн 33.1.5-аа л барина. УИХ-тай зөвшилцөн эгүүлэн татах эрх зөвхөн Ерөнхийлөгчид бий. ЗГ энд ямар ч хамаа байхгүй. ЗГ-ын тухай хууль, Үндсэн хууль зөрчвөл сүүлийнхийг нь барина" гэх мэтээр өөрийн фэйсбүүк хуудаснаа бичжээ.

УИХ-ын даргад Ерөнхийлөгчийн тамгын газрын дарга З.Энхболдын илгээсэн албан бичиг

УИХ-ын тамгын газраас Ерөнхийлөгчийн тамгын газрын дарга З.Энхболдод илгээсэн албан бичиг

Сүүлийн жилүүдэд улс төрийн таагүй үйл ажиллагаанаас үүдэж иргэд эв нэгдэлгүй, талцаж хуваагдсан байдал нэлээд бий болоод байгаа билээ. Хэн нэгэн улс төрчийн уриалгаар талцаж хуваагдах биш, харин асуудлыг нухацтай судалж, тунгаан бодож, нөхцөл байдалд бодит үнэлэлт, дүгнэлт хийх шаардлагатай.

Тодруулбал: УИХ-ын тамгын газраас өгсөн албан бичигт С.Баяр, М.Энхсайхан нарыг эгүүлэн татахыг зөвшөөрөхгүй гэсэн ямар ч үг, өгүүлбэр байхгүй байгаа юм. Гэтэл Ерөнхийлөгчийн Тамгын газрын дарга ийнхүү илтэд худал мэдээллийг олон нийтийн сүлжээгээр дамжуулж, төрийн түвшинд өгч, авч байгаа албан бичгийг гуйвуулан мэдээлж буй нь зүйд хэр нийцэх бол..!

Ерөнхийлөгч бол Монголын ард түмний эв нэгдлийг илэрхийлэгч гэдгийг Үндсэн хуулиар тунхагласан. Тиймээс Ерөнхийлөгчийн тамгын газраас ард түмнийг илтэд худал мэдээллээр турхирсан, бодит үнэнээс хазайлгаж, гуйвуулсан мэдээллийг хувийн амбицаараа хэн нэгэн албан тушаалтан нь явуулж болно гэж үү?

Ямартай ч ард түмний итгэлээр сонгогдож, эх орон ард түмнийхээ төлөө ажиллана хэмээн чармайж байгаа Ерөнхийлөгчийг доод албан тушаалтанууд нь энэ мэтээр олон нийтэд буруу ойлгуулаад байх уу?

Н.Цэндбат