Монголд анх удаа усны менежментийг олон улсын ISO 46001:2019 стандартаар баталгаажууллаа

Стандартчилалын AFNOR Group-ийн 100 жилийн ойн ёслолын үеэр Монголын уул уурхайн салбарын томоохон төлөөлөл Энержи Ресурс компани усны үр ашгийн менежментийн ISO 46001:2019 олон улсын стандартын AFNOR Asia-аар баталгаажуулсан гэрчилгээг албан ёсоор гардан авлаа. Энэ үйл явдал нь Монгол Улсын усны үр ашгийн менежментийн шинэ түүх болж байна

Энержи Ресурс ХХК нь Тавантолгойн бүлэг ордын 4% болох “Ухаа худаг” уурхайд нүүрс олборлох, баяжуулах, тээвэрлэх, эскпортлох цогц үйл ажиллагаа 2009 оноос явуулж байна. Тус компанийн нүүрс баяжуулах үйлдвэр нь хаягдал усныхаа 95%-ийг дахин ашиглах технологитой.  Мөн бороо, үерийн усыг цуглуулж, ашиглах битүү технологи бүхий хөв цөөрөмтэй. Үйл ажиллагаа явуулж эхэлсэн цагаасаа хойш говийн усны нөөцийг үр ашигтай зарцуулах менежментийг тогтвортой, тууштай хэрэгжүүлж ирснээрээ Монгол Улсдаа сайн туршлага болж ирсэн. Тэгвэл энэ удаа усны үр ашигтай менежмент хэрэгжүүлсэн туршлагаа олон улсад баталгаажууллаа. Энэ нь уул уурхайн салбарт усны нөөцийг үр ашигтай зарцуулсан сайн туршлагаа олон улсад батлаж, манлайлал үзүүлж байна гэсэн үг.

Ухаа худаг уурхай 2025 онд ISO 46001:2019 усны үр ашигтай хэрэглээний менежментийн тогтолцооны шаардлагуудыг нэгдсэн менежментийн тогтолцоондоо нэвтрүүлж, усны хэрэглээг тасралтгүй сайжруулах системийг үе шаттайгаар хэрэгжүүлсэн. Түүнчлэн MNS 4943:2015 үндэсний стандартыг мөрдөхөөс гадна Олон Улсын Санхүүгийн Корпорацын санаачилга болох “Өмнийн говийн усны менежментийн Сайн дурын кодекс”-ын гишүүнээр элссэн.

Нэмээд дурдахад Энержи Ресурс ХХК нь Ухаа худагт 2009 онд 18мегаваттын цахилгаан станц ашиглалтад оруулж байсан бөгөөд тус станц нь мөн говийн нөхцөлд тохирсон хуурай хөргөлтийн системтэй, усны “0” хэрэглээтэй юм байна.