Эрдэнэдалай сумын малчид эрдэнэшиш амжилттай тариалжээ

Дундговь аймгийн Эрдэнэдалай сумын “Гүн гашуун хар толгой” хоршооныхон ноднин жил багахан газарт туршилтын журмаар эрдэнэ шиш тариалжээ. Нэлээд орой буюу наймдугаар сарын нэгэнд тарьсан эрдэнэ шиш нь хоёр сар хүрэхгүй хугацаанд 50-60 см ургасан байна. Ингээд говь нутагт эрдэнэ шиш тариалж болох юм байна гэсэн урам авчээ. Сум орон нутгийнх нь удирдлагууд дэмжиж, гүний худаг гаргаж өгснөөр энэ жил 2 га газарт эрдэнэ шиш, мөн гурван га-д ногоон тэжээл тарьж, амжилттай ургуулаад байна.

“Гүн гашуун хар толгой” хоршооны гишүүн дөрвөн өрх эрдэнэ шишийн талбайгаа ээлжлэн харж хамгаалж, усалгаа, арчилгааг нь хийдэг байна. Хоршооны гишүүд нийлж эрдэнэ шишийн талбайгаа хашаажуулж, дуслын усалгааны систем, 25 тн-ын ёмкост болон худгаас ус татах насос, мотор зэргийг худалдан авчээ.

“Мотор ажиллуулж ус татахад бензин шатахуунд багагүй зардал гарсан. Тиймээс ирэх жилээс худаг дээрээ нарны панел байрлуулж, сэргээгдэх эрчим хүч ашиглан ус татах насосоо ажиллуулах юм бол зардал бага байх юм байна гэж ярилцаж байгаа. Мөн аймгийн Улаан загалмайн хорооноос 40 сая төгрөгийн дэмжлэг үзүүлэхээр болсон. Усалгаагаа шийдчихвэл эрдэнэ шиш тарьж, ургуулаад байж болох юм байна” хэмээн хоршооны гишүүн Н.Гансүх ярилаа. Өнгөрсөн зун БНХАУ-ын ӨМӨЗО-ы Шилийн гол аймгийн Сөнөд баруун хошууны удирдлага болон малчид ирж “Гүн гашуун хар толгой” хоршооны эрдэнэшишийн тариалантай танилцаж, өөрсдийн туршлагаас хуваалцаж, зөвлөгөө өгсөн гэнэ.

Малчид ийнхүү нөхөрлөл, хоршоо байгуулан, хөрөнгөө нийлүүлж, ногоон тэжээл, эрдэнэ шиш тариалж байгаа нь өвөлжилтийн бэлтгэлийг хангах, малын тарга хүч, чанарыг сайжруулах, цаашилбал хол газар отор нүүдэл хийхгүй өвөлжиж, хаваржих зэрэг олон давуу талтай.