Б.Пүрэвдагва: Төрийн хүнд суртлыг цахимжуулах биш, устгах ёстой

Бодлогоо танилцуулсан хотын дарга төрийн хүнд суртлыг цахимжуулах биш, устгана гэдгээ илэрхийллээ. Энэ бол иргэд төрөөр гаргахыг хүссэн нэг шийдвэр. Набор барьж даргын үүд сахихгүй болсон ч, төрд байгаа өөрийн мэдээллээ төлбөр төлж цаасан дээр хувилан өгч байгаа нь төрийн төгс үйлчилгээ биш. Тэгвэл хотын дарга Б.Пүрэвдагва нэгдсэн сүлжээнд байгаа мэдээллийг эдийн засаг нь тийм ч таатай бус энэ улсын иргэн төлбөр төлж А4-ийн цаасан дээр хэвлэн гаргаж өгч буй төрийн хүнд суртал, чирэгдлийг цуцална гэдгээ хэлж байна. “Чөлөөлье” санаачилгын хүрээнд өнөөдөр 103 төрлийн төрийн үйлчилгээнд шаарддаг баримт бичгийг хүчингүй болгосон. Төрийн үйлчилгээний шинэчлэлд “цуцал, цөөл, нэгтгэ, хугацаа тогтоо” гэсэн дөрвөн зарчмаар хэрэгжүүлэх юм байна. Төр иргэнээс өөрт нь байгаа мэдээллийг дахин нэхэж, байгууллагуудын уялдаагүй байдлын зардлыг иргэн төлөх ёсгүй гэсэн бодлогыг харин ч нэг дэмжмээр санагдлаа.