Б.Пүрэвдагва: Хот бизнес хийдэг биш, бизнес хийх боломжийг олгогч болно

Нийслэлд өнөөдөр нийт хүн амын талаас илүү хувь нь амьдарч, Монгол Улсад үйл ажиллагаа явуулж буй аж ахуй нэгжийн 76 хувь, худалдаа үйлчилгээний 84 хувь төвлөрч, ДНБ-ний 70 хувийг дангаар бүрдүүлж байна. Нийслэл 2026 оныг “Нийслэлийг дэмжих жил” болгон зарласан. Бодлогоо танилцуулж буй Нийслэлийн засаг дарга бөгөөд Улаанбаатар хотын захирагчийн бодлого зорилтод нийслэл бизнесийнхэнтэй өрсөлдөхгүй, харин дэмжигч нь байна гэсэн санаа оржээ. Аж ахуйн нэгжээ дэмжинэ гэсэн бодлогыг нь дэмжихгүй байхын аргагүй юм. Энэ нь цаад утгаараа нийслэлд үйл ажиллагаа явуулж буй 200 орчим мянган аж ахуйн нэгж болон тэнд ажиллаж буй ажилчдын ажлын байрыг хадгалах, хөдөлмөрийн хөлс нэмэгдэх нэг шалтгаан ч болно гэж харж болно.  Өнөөдрийн байдлаар нийслэлд төр, хувийн хэвшлийн түншлэлээр 42 төсөл хэрэгжиж байна. Хотод тулгамдсан бүх асуудлыг зөвхөн төсвөөр шийдэх боломжгүй. Эрчим хүч, дулаан, хог, ус, тээвэр, хүнсний хангамж, нийтийн үйлчилгээ зэрэг олон салбарт хувийн хэвшилтэй хамтран ажиллахад нээлттэй гэнэ. Хот засгийн газартай уялдаатай ажиллаж, 9 бүлгийн 84 нэр төрлийн үйлчилгээний зөвшөөрлийг цуцалж, нэгдсэн цахимд системд холбоод байна.