Чанга дуугарсанд бус, асуудал байгаа газарт төсөв очно

Нийслэлийн засаг дарга бол улсаар төлөөлбөл ерөнхий сайдын үүрэг, хариуцлага хүлээсэн алба. Хэн илүү чанга дуугарсанд бус хотын хаана шийдвэрлэх асуудал байна тэр газар төсөв зарцуулагдах ёстой гэсэн чиг шугамыг баримтлах алба. Нөлөөлөлд автах бус иргэдийн сонирхол, санал болон нийслэлийн тулгамдсан асуудлыг судалж тэнд төсвийн хөрөнгийг зарцуулах чиг үүрэгтэй. Энэ ч үүднээс “Хотын дарга сонсож байна 150-150” платформыг нээн ажлуулсан. Иргэдийн санал, гомдлыг хүлээн авч, асуудлыг ажил хариуцсан 22 удирдлагад хуваарилан ажлын 5 өдөрт хариу өгөх тогтолцоог хэрэгжүүлнэ. Хотын даргын бодлогод “хянуулна” гэдэг үг хэд хэд туссан байна. Сайн удирдлага гэдэг шүүмжлэлгүй байх биш, иргэд өөрсдөө шалгаж болохуйц мэдээлэлтэй байхыг хэлдэг. Хяналтыг иргэдийг чөлөөтэй тавьж, хот санал шүүмж аль алийг нь хүлээн авна гэсэн үг юм.