Сүхбаатар аймагт автомашин шатсаны улмаас 2100 га талбайд хээрийн түймэр гарчээ

Сүхбаатар аймгийн Эрдэнэцагаан сумын Бадрах багийн “Чулуут” гэдэг газарт автомашин шатсаны улмаас хээрийн түймэр гарсан тухай дуудлагыг есдүгээр сарын 10-ны өдрийн 15:25 цагт хүлээн авчээ. Тус газар нь аймгийн төвөөс зүүн урд зүгт 150 км, сумын төвөөс баруун хойд зүгт 70 км-ийн зайд оршдог байна.

Дуудлагын дагуу Сүхбаатар аймгийн Онцгой байдлын газрын Эрдэнэцагаан сум дахь 47 дугаар ангийн алба хаагчид болон Асгат сумын Засаг даргын Тамгын газрын ажилтнууд ажиллаж, хээрийн түймрийг мөн өдрийн 21:40 цагт цурманд оруулж, 23:35 цагт бүрэн унтраасан байна.

Урьдчилсан байдлаар түймэрт 2100 га орчим талбай өртөж, шатсан байна. Түймрийн шалтгаан, нөхцөл байдлыг холбогдох байгууллагууд тодруулж байна.