Гаалийн албан тушаалтан 88.5 сая төгрөгийн хахууль авсан хэргээр ял шийтгүүлжээ

Замын-Үүд дэх гаалийн газрын Эрсдэлийн удирдлагын албаны даргаар ажиллаж байсан Н.Т нь гаалийн итгэмжлэгдсэн төлөөлөгч Т.Э, Д.С нараас нийт 88.5 сая төгрөгийн хахууль авсан хэргээр шүүхээс ял шийтгүүлжээ.

Тодруулбал, Н.Т нь албан тушаалын байдал, бүрэн эрх, чиг үүрэгтэйгээ холбогдуулан гаалийн хилээр мэдүүлсэн барааг саадгүй, даруй гаргах нөхцөл бүрдүүлснийхээ хариуд Т.Э, Д.С нараас хахууль авсан байна.

Хэрэгт дурдсанаар, Д.С нь Н.Т-д 18 удаагийн үйлдлээр нийт 52.5 сая төгрөг, Т.Э нь 9 удаагийн үйлдлээр нийт 36 сая төгрөгийн хахууль тус тус өгчээ.

Прокуророос Н.Т-д Эрүүгийн хуулийн 22.4 дүгээр зүйлийн 1 дэх хэсэгт заасан нийтийн албан тушаалтан хахууль авах, харин Д.С, Т.Э нарт 22.5 дугаар зүйлийн 1 дэх хэсэгт заасан хахууль өгөх гэмт хэрэгт тус тус яллах дүгнэлт үйлдэн хэргийг шүүхэд шилжүүлсэн байна.

Шүүхээс Н.Т-г нийтийн албан тушаалтан хахууль авах гэмт хэрэг үйлдсэн гэм буруутайд тооцож, нийтийн албанд ажиллах эрхийг 3 жилээр хасаж, 1 жилийн хугацаагаар хорих ял оногдуулжээ.

Харин Т.Э, Д.С нарыг хахууль өгөх гэмт хэрэг үйлдсэн гэм буруутайд тооцож, нийтийн албанд ажиллах эрхийг 3 жилээр хасаж, тус бүр 8-10 сая төгрөгөөр торгох ял шийтгэсэн байна.