Үнэт эдлэл хулгайлж, 494.9 саяын хохирол учруулжээ

Дорноговь аймгийн Сайншанд сумын нутаг дэвсгэрт худалдааны төвийн байранд хууль бусаар нэвтэрч, үнэт эдлэлийн дэлгүүрээс их хэмжээний эд зүйл хулгайлсан хэрэгт Т.Ж, Н.М нарыг шүүхээс гэм буруутайд тооцжээ.

Тодруулбал, Т.Ж, Н.М нар нь 2026 оны нэгдүгээр сард бүлэглэн худалдааны төвийн байранд хууль бусаар нэвтэрч, үнэт эдлэлийн дэлгүүрээс 194 нэр төрлийн, нийт 273.4 сая төгрөгийн үнэт эдлэл хулгайлсан байна.

Уг үйлдлийн улмаас бусдад нийт 494.9 сая төгрөгийн хохирол учирсан бөгөөд прокуророос тэдэнд Эрүүгийн хуулийн 17.1 дүгээр зүйлийн 2 дахь хэсгийн 2.1, 2.3 дахь заалтад заасан буюу орон байранд нэвтэрч бусдын эд хөрөнгийг хулгайлсан, их хэмжээний хохирол учруулсан гэх үндэслэлээр яллах дүгнэлт үйлдэн хэргийг шүүхэд шилжүүлжээ.

Шүүхээс Т.Ж, Н.М нарыг бусдын орон байранд нэвтэрч, хулгайлах гэмт хэрэг үйлдсэн гэм буруутайд тус тус тооцож, 3-4 жилийн хорих ял оногдуулсан байна.