110.6 грамм “өвс” гэх нэршилтэй бодис хууль бусаар олж авч, хадгалсан хэргийг шүүхэд шилжүүлжээ

Н.Ү нь 2024 оны зургаа, долдугаар сарын үед Баянгол дүүргийн нутаг дэвсгэрт хориглосон сэтгэцэд нөлөөт бодис болох дельта-9 тетрагидроканнабинолын агууламжтай, “өвс” гэх хэрэглээний нэршилтэй ургамлыг худалдаалах зорилгогүйгээр хууль бусаар олж авсан байна.

Уг бодисын цэвэр жин 110.6 грамм бөгөөд Н.Ү нь 2025 оны дөрөвдүгээр сарын 25-ны өдрийг хүртэл өөрийн биедээ хадгалсан гэх хэрэгт холбогджээ.

Прокуророос түүний үйлдлийг Эрүүгийн хуулийн 20.7 дугаар зүйлийн 1 дэх хэсэгт заасан хориглосон сэтгэцэд нөлөөт бодисыг худалдаалах зорилгогүйгээр хууль бусаар олж авсан, хадгалсан гэмт хэргийн шинжтэй гэж үзэн яллах дүгнэлт үйлдэж, хэргийг шүүхэд шилжүүлсэн байна.