Олон Улсын стандартын мини хөлбөмбөгийн талбай ашиглалтанд орлоо

ОЛОН УЛСЫН СТАНДАРТЫН МИНИ ХӨЛБӨМБӨГИЙН ТАЛБАЙ АШИГЛАЛТАД ОРЛОО 

Аймгийн Засаг дарга Ш.Ёл өнгөрсөн 1 дүгээр сард Монголын Хөлбөмбөгийн холбооны ерөнхийлөгч Ц.Анандбазартай байгуулсан гэрээний хүрээнд Олон Улсын Хөлбөмбөгийн холбооны санхүүжилтээр Дорнод аймагт маань олон улсын жишиг стандартын 20х40-ийн харьцаатай мини-хөлбөмбөгийн иж бүрэн талбайтай нээлтээ хийлээ. 

Нээлтэд аймгийн Засаг дарга Ш.Ёл, УИХ-ын гишүүн, Азийн Хөлбөмбөгийн холбооны дэд ерөнхийлөгч А.Ганбаатар, Монголын Хөлбөмбөгийн холбооны дэд ерөнхийлөгч С.Жаргалсайхан, Хэнтий аймгийн Хөлбөмбөгийн холбооны нарийн бичгийн дарга Жанцан-Эрдэнэ, Сүхбаатар аймгийн Хөлбөмбөгийн холбооны нарийн бичгийн дарга Алтан-Эрдэнэ нар оролцлоо. 

Дорнод аймгийн хэмжээнд сүүлийн 4 жилд “Хүн болох багаасаа” спортын төслийн хүрээнд давхардсан тоогоор 900 гаруй хүүхэд, үүнээс охид, хөвгүүдийн шигшээ багуудад 100 гаруй хүүхэд хичээллэж тогтмол аймгаа төлөөлөн тэмцээн, уралдаанд амжилттай оролцож байна.

Дорнод аймагт хөлбөмбөгийн спортыг дэмжиж аймгийн төсвөөс Өсвөрийн хөлбөмбөгийн шигшээ багтай ажиллах  дасгалжуулагчийн цалинд 36 сая, Монголын Хөлбөмбөгийн холбооны дэргэдэх Хүүхдийн Хөлбөмбөгийн Академид суралцах 4 хүүхдийн сургалтын зардалд 50 сая, “Багийн спортыг хөгжүүлэх, дэмжих зардал”-аас Хөлбөмбөгийн багий спортод зориулж 10 сая, нийт 120,9 сая төгрөгийг тус тус дэмжлэг үзүүлж байна.

Аймгийн Засаг дарга Ш.Ёл хэлсэн үгэндээ "Энэхүү бүтээн байгуулалтыг манай аймагт хэрэгжүүлэхэд дэмжлэг үзүүлсэн УИХ-ын гишүүн М.Бадамсүрэн, Монголын Хөлбөмбөгийн холбооны ерөнхийлөгч Ц.Анандбазар нарт талархал илэрхийлж, хүүхэд, залуучууд маань стандартын шаардлага хангасан аюулгүй, тухтай орчинд хичээллэж, чөлөөт цагаа зөв өнгөрүүлэхээс гадна ирээдүйн тив, дэлхийн олон арван аваргууд төрөн гарна гэдэгт итгэлтэй байна." гэв.