ЗАВХАН: Отгон суманд тарваган тахлын байгалийн голомт идэвхтэй байгааг тогтоожээ

Завхан аймгийн Отгон сумын Баянбулаг багийн нутагт тарваган тахлын байгалийн голомт идэвхтэй байгааг Зоонозын өвчин судлалын төвөөс тогтоожээ.

Тодруулбал, наймдугаар сарын 10-нд тус багийн Индэр нүүр гэх газраас мэрэгч амьтны гурван зэм олдсон байна. Дуудлагын дагуу ажилласан мэргэжлийн баг зэмүүдээс сорьц авч лабораторийн шинжилгээ хийхэд Yersinia pestis буюу тарваган тахлын үүсгэгч нян илэрчээ.

Үүнтэй холбогдуулан мэргэжлийн байгууллагууд голомтот бүсэд тандалт, шинжилгээ хийж, иргэдэд тарваган тахлаас урьдчилан сэргийлэх зөвлөмж, сэрэмжлүүлэг хүргэж байна.

Мөн Түдэвтэй сумын Хавцгайт, Хунт, Халзан бүрэгдэй, Нөмрөг сумын Цагдуултайн дөрвөн секторын нийт 36 мянган га талбайд тарваган тахлын байгалийн голомтын тандалт, шинжилгээ хийжээ.

Энэ үеэр 60 гаруй малчин иргэнд зоонозын халдварт өвчнөөс урьдчилан сэргийлэх мэдээлэл өгч, 129 ширхэг санамж, зурагт хуудас тараасан байна.

Тарваган тахлаас сэргийлэхийн тулд:

• Тарвага агнахгүй, тарваганы мах, арьс шир, эд эрхтэнтэй харьцахгүй байх
• Үхсэн болон өвчилсөн байж болзошгүй мэрэгч амьтанд хүрэхгүй байх
• Бөөс, бүүрэгт хазуулахаас сэргийлэх
• Сэжигтэй мэрэгч амьтны зэм илэрвэл өөрөө хүрэлгүйгээр мэргэжлийн байгууллагад мэдэгдэх

Тарвагатай харьцсан болон тарваганы бөөсөнд хазуулсны дараа гэнэт өндөр халуурах, чичрүүдэс хүрэх, толгой болон бие өвдөх, бөөлжих, тунгалгийн булчирхай томорч өвдөх зэрэг шинж тэмдэг илэрвэл яаралтай эмнэлгийн байгууллагад хандахыг мэргэжлийн байгууллагаас анхаарууллаа.