Тарваган тахал өвчнөөс урьдчилан сэргийлэх нэгдсэн сургалт зохион байгууллаа

Нийслэлийн Засаг даргын 2026 оны А/1157 дугаар захирамжийн хэрэгжилтийг хангах, тарваган тахал өвчнөөс урьдчилан сэргийлэх, хяналт шалгалтаар үүрэг гүйцэтгэж байгаа алба хаагчдын мэдлэг, ур чадварыг дээшлүүлэх зорилгоор нэгдсэн сургалтыг зохион байгууллаа.

Сургалтыг Зооноз өвчин судлалын үндэсний төвтэй хамтран 2026 оны 08 дугаар сарын 31-ний өдөр Нийслэлийн Онцгой байдлын газрын сургалтын танхимд зохион байгуулсан бөгөөд халдварт болон зоонозын өвчнөөс урьдчилан сэргийлэх, эрсдэлээс хамгаалах, хяналт шалгалтын үед анхаарах асуудал зэрэг сэдвээр мэдээлэл, зөвлөмж өглөө.

Тус сургалтад тарваган тахал өвчнөөс урьдчилан сэргийлэх хяналтын постод үүрэг гүйцэтгэх Цагдаагийн ерөнхий газрын Экологийн цагдаагийн алба, Тээврийн цагдаагийн алба, Нийслэлийн цагдаагийн удирдах газар, Нийслэлийн Эрүүл мэндийн газар, Нийслэлийн Мал эмнэлгийн газар, Нийслэлийн Байгаль орчны газар болон дүүргийн холбогдох байгууллагуудын нийт 118 алба хаагч хамрагдаж, сургалтын төгсгөлд тус газрын дэд дарга, дэд хурандаа Э.Батбаяр алба хаагч нарт анхаарах асуудлаар үүрэг, чиглэл өглөө.
Энэхүү сургалт нь тарваган тахал өвчнөөс урьдчилан сэргийлэх хяналт шалгалтын үйл ажиллагаанд оролцож буй байгууллагуудын хамтын ажиллагааг сайжруулах, алба хаагчдын бэлэн байдлыг хангах, халдварын эрсдэлийг бууруулах ач холбогдолтой юм.