Дорноговь аймаг цэвэршүүлсэн ус түгээх төвтэй болжээ

Дорноговь аймгийн Алтанширээ сумын ЗДТГ-аас иргэдийн ундны усны хэрэгцээг хангах зорилгоор цэвэршүүлсэн усны төвийг байгуулж, энэ сарын 13-нд ашиглалтад орууллаа.

Тус бүтээн байгуулалтыг аймгийн төсвийн 129.1 сая төгрөгийн хөрөнгө оруулалтаар “Баялаг говь” ХХК гүйцэтгэжээ.

Цэвэршүүлсэн усны төв нь 24 цагийн турш тасралтгүй ажиллах бүрэн автомат, ухаалаг системтэй бөгөөд иргэд ухаалаг худгийн картаа цэнэглэн, одоо мөрдөж буй үнээр усаа худалдан авах боломжтой.

Говийн бүсийн ундны ус хатуулаг ихтэй байдаг. Харин цэвэршүүлсэн усны төв ашиглалтад орсноор Алтанширээ сумын 1300 гаруй иргэн 24 цагийн турш 99 хувийн цэвэршүүлсэн усаар хангагдах боломж бүрджээ.

Ингэснээр баллонтой ус тээвэрлэн хэрэглэдэг байдлыг халж, иргэд цэвэр усыг ойроос, хямд, хүртээмжтэй авах нөхцөл бүрдсэн байна.

Алтанширээ сум нь Дорноговь аймгийн төвөөс зүүн хойд зүгт 90 гаруй км-ийн зайд оршдог.