Л.Энх-Амгалан: Хүүхдийн эсрэг аливаа хүчирхийлэлтэй бид хэзээ ч эвлэрч болохгүй

Боловсролын сайд Л.Энх-Амгалан Ховд аймагт бусдын гарт харамсалтайгаар амиа алдсан 10 настай охины асуудалтай холбогдуулан өөрийн цахим хуудаснаа ийн нийтэлжээ.

Тэрээр "Хүүхдүүд сэтгэл зүрхний боловсролгүй хүмүүсийн золиос болсоор байна. Тэд ээж, аавдаа, гэр бүлдээ амин эрдэнэ байх ёстой.

Хүүхдийн хүчирхийллийн хэргийн 70 хувь нь гэр бүлийн орчинд үйлдэгддэг. Тиймээс гэр бүлийн болон сэтгэл зүрхний боловсрол нэн чухал болж байна.

Бусдыг ойлгох (Empathy), бусдыг хайрлах, энэрэн нигүүлсэнгүй байх (Compassion) зэрэг сэтгэл зүрхний боловсролыг энэ жилээс цэцэрлэг болон нэгдүгээр ангиас эхлэн олгож эхэлнэ.

Одоо бидэнд зүрх сэтгэлийн боловсрол ус, агаар мэт хэрэгтэй байна.

Дэндүү эмгэнэлтэй, дэндүү харамсалтай. Бусдын гарт алтан амиа алдсан Ховдын охин болон түүний гэр бүлд эцэг хүний хувьд гүн эмгэнэл илэрхийлье.

Хүүхдийн эсрэг аливаа хүчирхийлэлтэй бид хэзээ ч эвлэрч болохгүй!" гэжээ