Сайд Ц.Идэрбат НҮБ-ын ХХААБ-тай хөдөө аж ахуйн салбарын хамтын ажиллагааг өргөжүүлнэ

Даян дэлхийн малчдын чуулганы нэгдсэн хуралдааны үеэр УИХ-ын гишүүн, Хүнс, хөдөө аж ахуй, хөнгөн үйлдвэрийн сайд Ц.Идэрбат НҮБ-ын ХХААБ-ын Ерөнхий захирлын орлогч Танават Тиенсинтэй уулзаж, Монгол Улсын хүнс, хөдөө аж ахуйн салбарын бодлого болон цаашдын хамтын ажиллагааны талаар санал солилцлоо.

Уулзалтын үеэр Монгол Улс 1973 онд НҮБ-ын ХХААБ-д гишүүнээр элссэнээс хойш хүнс, хөдөө аж ахуйн салбарт урт хугацааны хамтын ажиллагааг хөгжүүлж ирснийг сайд Ц.Идэрбат онцлов.

Тэрбээр хүнсний баталгаат байдлыг хангах, хөдөө аж ахуйн бүтээмж, өрсөлдөх чадварыг нэмэгдүүлэх, уур амьсгалын өөрчлөлтөд тэсвэртэй үйлдвэрлэлийг хөгжүүлэх, түүхий эдийг дотооддоо боловсруулах, нэмүү өртөг шингээх болон экспортыг нэмэгдүүлэхэд Засгийн газар анхаарч байгааг танилцууллаа.

Мөн “Нутагтаа эзэн 100:1000” хөтөлбөрийн хүрээнд орон нутгийн үйлдвэрлэл, хөрөнгө оруулалтыг нэмэгдүүлж, малчид, тариаланчид, үйлдвэрлэгчдийн хамтын ажиллагааг бэхжүүлэх зорилт тавьж байгааг мэдээлэв.

НҮБ-ын ХХААБ-ын Ерөнхий захирлын орлогч Танават Тиенсин Монгол Улсад хэрэгжүүлж буй төсөл, хөтөлбөрүүд үр дүнтэй байгаад сэтгэл хангалуун байгаагаа илэрхийлээд, Монгол Улсын хөдөө аж ахуйн урт, дунд, богино хугацааны төлөвлөгөө боловсруулахад хамтран ажиллах, мал аж ахуйн чадавхжуулах сургалтын төв байгуулах боломжтойг хэллээ.

Түүнчлэн Киргизстан, Тажикистан зэрэг оронд дрон ашиглан мал тоолох, төрөл, нас, хүйсээр нь бүртгэх технологи нэвтрүүлсэн туршлагаа Монголд хэрэгжүүлэх боломжтойг танилцуулжээ. Мөн дрон ашиглан бэлчээрийн ашиглалтыг хянах, ургамлын үр цацах замаар бэлчээрийн доройтлыг бууруулах технологийг нэвтрүүлэх боломжтойг онцолсон байна.

Сайд Ц.Идэрбат “Нэг сум–Нэг мал эмнэлэг” хөтөлбөрийг хэрэгжүүлэхээр ажиллаж байгаагаа дурдаад, энэ чиглэлээр НҮБ-ын ХХААБ-тай хамтран ажиллах сонирхолтой байгаагаа илэрхийлэв.

Мөн 2026 онд Монгол Улсын баруун бүсэд шүлхийн SAT-1 хэвшил анх удаа бүртгэгдсэнтэй холбоотойгоор малын эрүүл мэндийн тогтолцоонд шинэ сорилт тулгарсныг хэлж, өвчний тандалт, эрт сэрэмжлүүлэг, био аюулгүй байдал, лабораторийн чадавх, вакцины хангамж болон малын бүртгэл, гарал үүслийн мөшгөх тогтолцоог сайжруулахад олон улсын техникийн дэмжлэг шаардлагатайг онцоллоо.

Талууд малын эрүүл мэнд, хүнсний аюулгүй байдал, бэлчээрийн менежмент, хөдөө аж ахуйн технологи болон малын гаралтай бүтээгдэхүүний экспортыг нэмэгдүүлэх чиглэлээр хамтын ажиллагаагаа цаашид өргөжүүлэхээр санал нэгдэв.