Гадаад худалдааны бараа эргэлт 19.4 тэрбум ам.долларт хүрчээ

Монгол Улс энэ оны эхний 7 сард 153 улстай худалдаа хийж, гадаад худалдааны бараа эргэлт 19.4 тэрбум ам.долларт хүрчээ.

Үүнээс экспорт 12.2 тэрбум ам.доллар, импорт 7.2 тэрбум ам.долларт хүрч, тэнцэл 5.0 тэрбум ам.долларын ашигтай гарсныг Үндэсний статистикийн хороо мэдээлэв.

Бараа эргэлтийн хэмжээ өнгөрсөн оны мөн үеийнхээс 36 хувь буюу 5.1 тэрбум, экспорт 57.5 хувь буюу 4.5 тэрбум, импорт 10.4 хувь буюу 675.5 сая, тэнцэл 4 дахин буюу 3.8 тэрбум ам.доллароор нэмэгдэв. Үүнд зэсийн хүдэр 2.6, нүүрс 1.7 тэрбум, самнасан ноолуур 71.2, гянтболдын хүдэр, баяжмал 42, хар тугалганы хүдэр, баяжмал 37.6 сая ам.доллароор нэмэгдсэн нь нөлөөлжээ. Харин тунгаасан зэс ба хайлш 37.9, молибдений хүдэр 12, адууны мах 7.3, боловсруулаагүй газрын тос 1.5 сая ам.доллароор багассан байна.

Импорт өнгөрсөн оны мөн үеийнхээс 675.5 сая ам.доллароор нэмэгдэхэд дизелийн түлш 343.7, авто бензин 58.2, шинэ дугуй 41.4, хар төмөр бүтэц, эд анги 33.5 сая ам.доллароор өссөн нь нөлөөлжээ. Харин суудлын авто машин 155, ачааны автомашин 57, ухаалаг гар утас 19.6 сая ам.доллароор буурсан байна.

Экспорт энэ оны долоодугаар сард өмнөх сарынхаас 5.8 хувь буюу 111.3 сая, импорт 15.4 хувь буюу 190.7 сая ам.доллароор багаслаа. Эрдэс бүтээгдэхүүн, үнэт чулуу, металл гоёлын зүйлс, нэхмэл эдлэл нийт экспортын 97.6 хувийг бүрдүүлсэн бол импортын 70.7 хувийг эрдэс бүтээгдэхүүн, машин механик төхөөрөмж, цахилгаан болон тээврийн хэрэгсэл, төмөрлөг, түүгээр хийсэн бүтээгдэхүүн эзэлж байна. Дээрх хугацаанд хилийн дундаж үнэ алтны тухайд өнгөрсөн оны мөн үеийнхээс унц тутамд 1505, зэсийн хүдрийн үнэ тонн тутамд 1283.2, нүүрснийх 0.7 ам.доллароор өссөн бол төмрийн хүдрийнх тонн тутамд 0.7 ам.доллароор багасжээ.

Энэ оны эхний  7 сард БНХАУ 40.2, ОХУ 27.7, Япон Улс 9.2, БНСУ 3.9, АНУ 3.2, ХБНГУ 2.2 хувийг эзэлж, нийт импортын 86.4 хувийг бүрдүүлжээ. Тухайлбал, ОХУ-аас авсан барааны 74.7 хувийг нефтийн бүтээгдэхүүн, Японоос импортолсон барааны 76.5 хувийг суудлын авто машин, БНХАУ-аас авсан барааны 5.8 хувийг ачааны авто машин эзэлж байв. Авто бензиний импорт дээрх хугацаанд 550.5 мянган тн болж, өнгөрсөн оны мөн үеийнхээс 14.8, дизель түлшний импорт 1.1 сая тн болж, 10 хувиар нэмэгджээ.