Тавантолгой түлш ХХК-ийн Гүйцэтгэх захирлын үүрэг гүйцэтгэгчээр С.Даваасүрэнг томиллоо

“Тавантолгой түлш” ХХК-ийн Төлөөлөн удирдах зөвлөлийн ээлжит хуралдаанаар компанийн гүйцэтгэх захирлыг өөрчилж, Агаарын бохирдлыг бууруулах үндэсний хорооны Ажлын албаны даргаар ажиллаж байсан С.Даваасүрэнг томиллоо.

С.Даваасүрэн нь Нийслэлийн Мэргэжлийн хяналтын газрын дэд дарга, Агаарын бохирдлыг бууруулах үндэсний хорооны Ажлын албаны даргаар ажиллаж байсан туршлагатай.

Харин гүйцэтгэх захирлаас чөлөөлөгдсөн Ц.Эрдэнэбаярын ажилласан хугацаанд мидлинг суурьтай шахмал түлшнээс хагас коксон түлшид шилжих гурав дахь үеийн шинэчлэлийг хэрэгжүүлсэн байна.

Энэ хүрээнд хагас коксон түлшний суурь судалгааг эрдэм шинжилгээ, судалгааны байгууллагуудтай хамтран хийлгэж, хатуу түлшний стандартыг шинэчлэн батлуулан хэрэглээнд нэвтрүүлжээ. Мөн нийслэлийн 170 мянга гаруй өрхийг хагас коксон түлшээр хангах зорилгоор БНХАУ-аас 367 мянган тонн түлш импортолж, улсын болон хувийн хэвшлийн төмөр замын байгууллагуудтай хамтран өвлийн ачааллыг давсан байна.

Түүнчлэн түлш борлуулах цэгийн тоог 650-аас 450 болгон бууруулж, байршлыг оновчилсон бөгөөд түлшний нөөц, тээвэрлэлт, түгээлт, борлуулалтыг цахимжуулж “Хотула” аппликэйшнийг нэвтрүүлжээ. Гэр хорооллын өрхүүдийг хийн түлшид шилжүүлэх ажлыг мөн эхлүүлсэн байна.

ТУЗ-ийн мэдээлснээр 2025–2026 оны өвөл агаар бохирдуулагч бодисын агууламж буурч, нийслэлийн агаарын бохирдол 23 хувиар буурсан үзүүлэлтийг АББҮХ-ны дэргэдэх Эрдэмтдийн зөвлөл болон олон улсын хөндлөнгийн байгууллагууд баталгаажуулсан байна.

Мөн Ц.Эрдэнэбаяр ажиллах хугацаандаа компанийн бүтэц, орон тоог цомхотгох, урсгал зардлыг бууруулах зэрэг менежментийн өөрчлөлтийг богино хугацаанд хэрэгжүүлж, үр бүтээлтэй ажилласныг Төлөөлөн удирдах зөвлөлөөс дүгнэжээ.