Шатахууны түгээлт ирэх даваа гарагаас хэвийн болно гэв

Б. Пагамдулам

1 цагийн өмнө

Шатахууны хангамж, нийлүүлэлтийг тогтворжуулах шуурхай штабаас өнөөдөр /2026.08.13/ шатахууны нийлүүлэлт, түгээлтийн нөхцөл байдлын талаар мэдээлэл өглөө.

ОХУ-аас өчигдөр Улаанбаатар хотод нийт 46 вагон буюу 2700 гаруй тонн АИ-92 автобензин иржээ. Үүнээс эхний 23 вагоныг буулгаж, нийслэлийн 75 ШТС-д 756 тонн, орон нутгийн 49 ШТС-д 441 тонн шатахуун хүргүүлсэн байна.

Одоогоор ОХУ-аас Монгол Улс руу 152 вагон буюу 9120 тонн АИ-92 автобензин тээвэрлэгдэж байгаа аж.

АҮЭБЯ-ны Төрийн нарийн бичгийн дарга Б.Дашпүрэв өнгөрсөн хоёр хоногт түгээлт бага байсан ч ирэх даваа гарагаас улсын хэмжээнд шатахууны түгээлтийг хэвийн болгоно гэдгийг онцоллоо.

Тэрбээр “Өнөөдөр, маргаашийн дотор орон нутгийн түгээлтийг нэмэгдүүлнэ. Мөн энэ ням гарагт нийслэлийн шатахууны хэрэгцээг хангах хэмжээний түгээлт хийнэ. Ирэх долоо хоногоос улсын хэмжээнд түлш, шатахууны түгээлтийг хэвийн болгохоор аж ахуйн нэгжүүдтэй хамтран ажиллаж байна” гэв.

Мөн Улаанбаатар төмөр зам түлш, шатахууны тээвэрлэлтийг шуурхай зохион байгуулж байгаа бол БНХАУ-аас ачигдсан 2000 тонн онгоцны түлш маргааш Замын-Үүд өртөөнд ирж, түгээлтэд бэлэн болох юм байна.

Түүнчлэн шатахуун импортлогч аж ахуйн нэгжүүд татварын өртэй байсан ч дансыг нь хаахгүй байх зохицуулалтыг Татварын ерөнхий газраас хийжээ.

Харин шатахуун түгээх станцуудын үүссэн дараалалтай холбоотойгоор Тээврийн цагдаагийн албанаас зохицуулалт хийж, автомашины оочир замын хөдөлгөөнд саад учруулахгүй байх арга хэмжээ авч байгаа аж.

Сэтгэгдэл (0)

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.

Сэтгэгдэл бичигдээгүй байна

Шинэ мэдээ