ТӨВ АЙМАГ: Цагаан жагсаалтад орох хүсэлтийг цахимаар илгээнэ

Авто зам ашигласны төлбөрийн шинэчилсэн тарифыг наймдугаар сарын 1-нээс мөрдөж эхэлсэнтэй холбоотойгоор тодорхой бүс нутгийн тээврийн хэрэгслийг зам ашигласны төлбөрөөс чөлөөлөх “цагаан жагсаалт”-д бүртгүүлэх хүсэлтийг цахимаар авч байна.

“Цагаан жагсаалт” нь нийслэлийн төвөөс алслагдсан дүүрэг, хороод болон Улаанбаатар хотын эргэн тойрны 50 км-ийн радиуст байрлах аймаг, сумдын тээврийн хэрэгсэлд хамаарах юм.

Тухайлбал, Төв аймгийн Зуунмод сумаас Улаанбаатар хот руу ажилдаа ирж, очдог иргэд энэхүү зохицуулалтад хамрагдах боломжтой.

Ингэхдээ E-Mongolia системд нэвтэрч, “Олон улс, улсын чанартай болон тусгай зориулалтын авто зам, замын байгууламж ашигласны төлбөрөөс чөлөөлөгдөх” үйлчилгээг сонгон хүсэлтээ цахимаар илгээх боломжтой. Хавсаргах материал нь PDF өргөтгөлтэй байх бөгөөд хүсэлтийг ажлын 5 хоногт шийдвэрлэж, хариу хүргүүлэхээр байна.

Харин шинэчилсэн тарифаар суудлын автомашины зам ашигласны төлбөрийг 1000 төгрөгөөс 5000 төгрөг, ачааны автомашины төлбөрийг 10 мянган төгрөгөөс 20 мянган төгрөг болгон нэмэгдүүлжээ.

Ингэснээр тээврийн хэрэгслийн ангиллаас хамааран зам ашигласны төлбөр 2-5 дахин нэмэгдсэн байна.