Зарим төрлийн олон улсын мал эмнэлгийн гэрчилгээг Нийслэлийн мал эмнэлгийн газар олгоно

Мал эмнэлгийн ерөнхий газраас зарим төрлийн олон улсын мал эмнэлгийн гэрчилгээ олгох үйлчилгээг Нийслэлийн мал эмнэлгийн газарт шилжүүлжээ.

Ингэснээр наймдугаар сарын 10-наас эхлэн Нийслэлийн мал эмнэлгийн газар Мал эмнэлгийн ерөнхий газрын нэрийн өмнөөс арьс, шир, ноос, ноолуур, адууны дэл, сүүл, сэв хялгас болон гэрийн тэжээвэр амьтантай холбоотой зарим төрлийн олон улсын гэрчилгээ олгох юм.

Иргэн, аж ахуйн нэгжийн хүсэлт гаргах үйл явц өөрчлөгдөхгүй. Хүсэлтийг өмнөхийн адил IVC–MAHIS системээр илгээж, шаардлагатай баримт бичгийг хавсаргана. Харин гэрчилгээ олгох байгууллагаар Нийслэлийн мал эмнэлгийн газрыг сонгох аж.

Хүсэлт гаргагч нь экспортлох бүтээгдэхүүний гарал үүсэл, мал эмнэлэг, ариун цэвэр, эрүүл ахуйн баталгаа, лабораторийн шинжилгээний дүн, боловсруулалт, халдваргүйтгэл, сав баглаа боодол, тээвэрлэлтийн мэдээлэл болон импортлогч улсын шаардсан бусад баримт бичгийг бүрдүүлсэн байх шаардлагатай.

Нийслэлийн мал эмнэлгийн газар хүсэлт, баримт бичгийг хянан шалгаж, холбогдох шаардлагыг хангасан тохиолдолд эрх бүхий улсын байцаагч гэрчилгээг баталгаажуулан олгоно.

Энэ зохицуулалтаар зарим төрлийн гэрчилгээ олголтыг нийслэлийн түвшинд шилжүүлж, экспортын үйлчилгээг иргэн, аж ахуйн нэгжид ойртуулах, үйлчилгээг шуурхай болгох зорилготой байна.