Наймдугаар сарын шатахууны хэрэглээг бүрэн хангах нөхцөл бүрджээ

ОХУ-аас нэмэлтээр 25 мянган тонн АИ-92 авто бензин, 5000 тонн онгоцны түлш нийлүүлэхээр болсон нь наймдугаар сарын шатахууны хэрэглээг бүрэн хангах нөөц бүрдүүлэх боломжийг бий болгожээ.

Ерөнхий сайдын захирамжаар байгуулсан Шатахууны хангамж, нийлүүлэлтийг тогтворжуулах шуурхай штабын мэдээлснээр “Роснефть” компаниас энэ сард ОХУ-аас 50 мянган тонн АИ-92 авто бензин, 15 мянган тонн Евро-5 төрлийн бүтээгдэхүүн худалдан авах захиалгыг баталгаажуулж, нийлүүлэлтийг эхлүүлсэн байна.

Мөн АҮЭБЯ-ны Төрийн нарийн бичгийн дарга Б.Дашпүрэвийн мэдээлснээр БНХАУ-аас 5000-6000 тонн АИ-92 авто бензин болон Евро-5 төрлийн бүтээгдэхүүн худалдан авахаар ачиж эхэлжээ. Түүнчлэн 3000 тонн онгоцны түлш худалдан авах гэрээ байгуулж, эхний 1000 тонныг ачуулсан байна.

Тэрбээр “Наймдугаар сарын 10-ны байдлаар 10,100 тонн нефтийн бүтээгдэхүүнд бүрдүүлэлт хийсэн” гэдгийг онцоллоо.

Харин ГХЯ-наас дэлхийн зах зээлд геополитикийн хурцадмал байдал, тодорхойгүй нөхцөл байдлын улмаас газрын тосны бүтээгдэхүүний хямрал үүсээд байгааг мэдээлэв. Үүнтэй холбоотойгоор Монгол Улсад үүсээд буй шатахууны нийлүүлэлтийн доголдол нь олон улсын нөхцөл байдалтай холбоотойг тус яамны хэвлэлийн төлөөлөгч Р.Нямдаваа тодотгосон байна.

Монгол Улс шатахуунаа голлон ОХУ, БНХАУ-аас импортолж байгаа бөгөөд агаарын түлшний импортын эх үүсвэрийг нэмэгдүүлэх зорилгоор Казахстан, БНСУ, Беларусь улстай яриа хэлэлцээ хийж байгаа аж.