Мансууруулах бодистой холбоотой хэрэгт шалгагдаж байсан иргэнийг Туркээс албадан авчирлаа

Тодруулбал, иргэн Г нь 2024 оны аравдугаар сард Эрүүгийн хуулийн 20.7.1-д заасан НҮБ-ын 1971 оны Сэтгэцэд нөлөөт бодисын тухай конвенцын хоёрдугаар жагсаалтад багтсан мансууруулах бодисыг худалдаалах зорилгогүйгээр хууль бусаар олж авч, хадгалсан хэрэгт холбогдон шалгуулж байжээ.

Гэвч хуулийн байгууллагад шалгагдаж байх хугацаандаа Монгол Улсын хилээр гарч, гадаад улсад оргон зайлсан байна.

Түүнийг Интерполын “хөх булант” зар мэдээгээр эрэн сурвалжилж, байршлыг тогтоосон бөгөөд Турк улсын Истанбул хотод хууль бусаар оршин сууж байсныг илрүүлжээ.

Монголын хууль сахиулах байгууллагууд Истанбул хотын Окмейдан орчмын эрүүгийн цагдаагийн алба хаагчидтай мэдээлэл солилцон хамтран ажиллаж, иргэн Г-ийг саатуулан баривчилсан байна.

Улмаар 2026 оны наймдугаар сарын 10-нд түүнийг Монгол Улсад албадан авчирч, мөрдөн шалгах ажиллагааг үргэлжлүүлж байгаа аж.

                                                        Эх сурвалж: ЦЕГ-ын Хар тамхитай тэмцэх алба