“Чөлөөлье” аяны хүрээнд төрийн үйлчилгээг цахимжуулж байна

Монгол Улсын Засгийн газрын “Чөлөөлье” аяны хүрээнд Байгаль орчин, уур амьсгалын өөрчлөлтийн яам иргэн, аж ахуйн нэгжид үзүүлэх төрийн үйлчилгээг илүү хялбар, шуурхай, ил тод болгох чиглэлээр үе шаттай цахим шинэчлэл хийж байна.

Энэ хүрээнд өмнө нь тусгай зөвшөөрөл, зөвшөөрөл авахад шаардлагатай мэдээлэл, бүрдүүлэх материал, холбогдох шаардлага, үйл явцын талаарх мэдээллийг хүний оролцоогүйгээр шуурхай авах боломжтой “Mazaalai AI” цахим туслахыг ашиглалтад оруулсан.

Үүний үргэлжлэл болгон shilen.mecc.gov.mn цахим системийг нэвтрүүлснээр иргэн болон аж ахуйн нэгж ДАН танилт, нэвтрэлтийн системээр нэвтэрч, албан бичиг, өргөдөл, гомдол, санал, хүсэлтээ яаманд биечлэн ирэхгүйгээр цахимаар илгээх боломжтой боллоо.

Мөн илгээсэн бичиг хэзээ бүртгэгдсэн, ямар газар, хэлтэс болон албан тушаалтанд хуваарилагдсан, тухайн албан тушаалтан дээр хэдий хугацаанд байгаа, шийдвэрлэлтийн аль шатанд явж байгаа, шийдвэрлэх хугацаа хэдийд дуусах зэрэг мэдээллийг цахимаар хянах боломж бүрдсэн.

Ингэснээр иргэн, аж ахуйн нэгж мэдээлэл авахын тулд заавал албан хаагчтай холбогдох, албан бичгийнхээ араас утсаар лавлах, яаманд биечлэн ирэх шаардлага багасаж, төрийн үйлчилгээг өөрсдөө цахимаар авах, явцыг нь ил тод хянах боломжтой болж байна.

Байгаль орчин, уур амьсгалын өөрчлөлтийн яам “Чөлөөлье” аяны хүрээнд төрийн үйлчилгээнд хүний оролцоо, шаардлагагүй шат дамжлага, цаасан ажиллагааг бууруулж, иргэн, аж ахуйн нэгжид мэдээлэл болон үйлчилгээг илүү шуурхай, хүртээмжтэй, ил тод хүргэх цахим шийдлүүдийг үе шаттай нэвтрүүлж байна.