Мөрдөн шалгах ажиллагаанд одоогоор 1026 хэрэг шалгагдаж байна

АТГ: 56 гомдол, мэдээллийг шалгаж, 6 хэргийг шүүхэд шилжүүлэх саналтай прокурорт хүргүүлжээ

Авлигатай тэмцэх газрын Мөрдөн шалгах хэлтэс наймдугаар сарын 3-9-ний өдрүүдэд гэмт хэргийн шинжтэй 56 гомдол, мэдээлэл шалгажээ.

Үүнээс 9 гомдолд хэрэг бүртгэлтийн хэрэг нээж, 4-т нь хэрэг нээхээс татгалзах, нэгийг нь харьяаллын дагуу шилжүүлэх саналтайгаар прокурорт хүргүүлсэн байна. Одоогоор 42 гомдол, мэдээллийг шалгаж байгаа аж.

Мөн мөрдөн байцаалтын ажиллагаа явуулсан 1038 эрүүгийн хэргээс зургааг шүүхэд шилжүүлэх, тавыг хаах саналтайгаар прокурорт хүргүүлж, нэг хэргийг нэгтгэн шалгажээ. Одоогоор 1026 хэрэг мөрдөн шалгах ажиллагаанд байна.

Шүүхэд шилжүүлэх саналтайгаар хүргүүлсэн хэргүүдэд албан тушаалаа урвуулан ашиглаж байгууллагад 54.4 сая төгрөгийн хохирол учруулсан, хахууль авсан, бусдад эдийн засгийн давуу байдал бий болгосон зэрэг үйлдэл багтжээ.

Тухайлбал, удирдах албан тушаалтан Б.Э нь ажил үүргээ гүйцэтгээгүй Д.Б-д ажилласан мэтээр бүртгэл гаргуулж, 28.8 сая төгрөгийн цалин олгуулсан гэх хэрэг, мөн хахууль авсан, ашиг сонирхлын зөрчилтэй этгээдэд давуу байдал бий болгосон, гэрээний төлбөрийг хувьдаа завшсан гэх хэргүүдийг мөрдөн шалгаж дуусган, прокурорт шилжүүлсэн байна.