Нийслэлийн цэцэрлэгийн бүртгэл өнөөдөр эхэллээ

2026-2027 оны хичээлийн жилд нийслэлийн төрийн өмчийн цэцэрлэгт хүүхдээ хамруулах цахим бүртгэл өнөөдөр /08.10/ 09:00 цагаас эхэллээ.

Эцэг эх, асран хамгаалагчид E-Mongolia платформоор хүүхдээ цэцэрлэгт хамруулах хүсэлтээ илгээх бөгөөд эхний шатны бүртгэл наймдугаар сарын 23-ны 23:59 цаг хүртэл үргэлжилнэ.

Иймд эцэг эх, асран хамгаалагчид бүртгэлийн хугацааг анхаарч, хүүхдийнхээ мэдээллийг урьдчилан шалган, хүсэлтээ хугацаанд нь илгээхийг холбогдох байгууллагууд зөвлөж байна.

Нийслэлд цэцэрлэгт хамрагдах 126 мянга гаруй хүүхэд байна

Боловсролын ерөнхий газрын мэдээллээр, 2026-2027 оны хичээлийн жилд улсын хэмжээнд 258,921 хүүхдийг сургуулийн өмнөх боловсролд хамруулах хэрэгцээ үүсэж байгаагаас 126,827 хүүхэд нь нийслэлд хамаарч байна.

Энэ жилийн цэцэрлэгийн элсэлтийг цахимаар зохион байгуулснаар эцэг эхчүүд цэцэрлэг дээр биечлэн очиж, урт дараалалд зогсох шаардлагагүй болохоос гадна хүүхдийн бүртгэл, хуваарилалтын үйл явцыг цахим хэлбэрээр зохион байгуулах боломж бүрдэж байгаа юм.

Хүүхдийн мэдээлэл зөрүүтэй бол бүртгэлд хүндрэл үүснэ

Эцэг эх, асран хамгаалагчид E-Mongolia системд нэвтэрч, хүүхдээ цэцэрлэгт хамруулах хүсэлтээ цахимаар илгээнэ.

Хүсэлт илгээхээс өмнө дараах мэдээллүүдийг урьдчилан шалгах шаардлагатай. Үүнд:

• Хүүхдийн овог, нэр, регистрийн мэдээлэл;
• Эцэг эх, асран хамгаалагчийн мэдээлэл;
• Хүүхдийн оршин суугаа хаягийн бүртгэл;
• Шилжилт хөдөлгөөний мэдээлэл;
• Өмнөх жил цэцэрлэгт хамрагдсан бол тухайн цэцэрлэгтээ үргэлжлүүлэн суралцах эсэх мэдээлэл;
• E-Mongolia дахь хувийн мэдээлэл.

Өмнөх бүртгэлүүдийн үеэр хүүхэд болон эцэг эхийн хаягийн мэдээлэл зөрүүтэй байх, шилжилт хөдөлгөөнийг хугацаанд нь баталгаажуулаагүй байх зэрэг нь бүртгэл хийхэд хүндрэл учруулж байсан.

Тиймээс өөрийн болон хүүхдийн хаяг, шилжилт хөдөлгөөн болон бусад хувийн мэдээллээ урьдчилан нягталж, баталгаажуулахыг зөвлөж байна.

E-Mongolia ашиглах боломжгүй иргэд харьяалах цэцэрлэгтээ хандана

Цахимаар бүртгүүлэх боломжгүй, эсвэл техникийн хүндрэл гарсан тохиолдолд харьяалах цэцэрлэг болон холбогдох боловсролын байгууллагад хандаж мэдээлэл, дэмжлэг авах боломжтой.

Иргэд бүртгэлийн хугацаанд мэдээллээ шалгуулж, хүүхдээ цэцэрлэгт хамруулах хүсэлтээ гаргах шаардлагатай.

Цэцэрлэгийн бүртгэл 14 хоног үргэлжилнэ

Нийслэлийн төрийн өмчийн цэцэрлэгийн цахим бүртгэл:

Эхлэх: 2026 оны наймдугаар сарын 10-ны 09:00 цаг 

Дуусах: 2026 оны наймдугаар сарын 23-ны 23:59 цаг 

Бүртгэл: E-Mongolia платформ

Бүртгэлийн сүүлийн өдрийг хүлээлгүй, хүсэлтээ эрт илгээхийг эцэг эх, асран хамгаалагчдад зөвлөж байна.

Бүртгэлтэй холбоотой асуудлаар дараах утсаар мэдээлэл авна

Боловсролын ерөнхий газар: 7014-0069 

Нийслэлийн боловсролын газар: 7011-3039 

E-Mongolia Call Center: 11-11