Сэлэнгэ аймгийн 70 МВт-ын ДЦС анхны галаа асаав

Сэлэнгэ аймгийн Сүхбаатар суманд 70 МВт-ын хүчин чадалтай ДЦС-ыг “Райд Монголиа” компани барьж буй. Тус станцын технологийн анхны галыг өчигдөр асаалаа.

Эрчим хүчний сайд Б.Найдалаа “Удахгүй ашиглалтад оруулах энэ станц нь цахилгаан болон дулааны чадлын дутагдлыг нөхөхөд хувь нэмэр оруулах, хараат байдлыг бууруулахад нөлөөтэй. Энэхүү төсөлд гар бие оролцож буй хүн бүхэнд баяр хүргэе” хэмээв

Улаанбаатар хотоос 311 км-ийн зайд барьж буй уг станц тус бүр 35 МВт турбингенератортай хоёр блок зуухтай байх юм. Станцад жилд 489.2 сая кВт.ц цахилгаан үйлдвэрлэн, 440.2 сая кВт.ц цахилгаан, 373 мянган Гкал дулаан түгээхээр тооцоолж байна

Барилга угсралтын ажлыг 2024 оны 5 дугаар сарын 1-нд эхлүүлсэн ба өвлийн оргил ачааллаас өмнө буюу 10 дугаар сард багтаан ашиглалтад оруулахаар ажиллаж байгаа юм.

Сэлэнгэ аймгийн хэрэглээг хангах тус ДЦС-ын барилга угсралтыг Камбож улсын МITIME групп түлхүүр гардуулах нөхцөлтэй гүйцэтгэж байна

Энэхүү станцад шинэ техник, технологи суурилуулахыг зорьж байгаа ба Монгол Улсад анх удаа карбон яндан ашиглах юм. Буулгаж, угсардаг ийм яндан ашиглах нь байгаль орчинд ээлтэй талаар Эрчим хүчний яамнаас мэдээлэв.