Хамгаалалтад авсан хүүхдүүдийн ээж Т.А-г бага насны хүүхдээ зодсон гэх үндэслэлээр түр саатуулжээ

Сошиал орчинд гэртээ тамхи татан хэвтэж, бага насны хоёр хүүхдийг айлган сүрдүүлэн “Өдөрт 2-3 удаа зодохгүй бол нойр хүрэхгүй шүү дээ” хэмээн ярьж буй эрэгтэйн бичлэг тархсан.

Цагдаагийн байгууллагаас уг бичлэгт шалгалт хийхэд бичлэгт гарсан эрэгтэй нь Э.Батбаатарын хамтран амьдрагч Т.А уг бичлэгийг нууцаар хийж, түүгээрээ сүрдүүлэн Э.Батбаатараас гурван удаагийн үйлдлээр нийт 280 мянган төгрөг авсан нь тогтоогдсон байна.

Мөн Т.А нь бага насны хүүхдэд хүч хэрэглэж, гэр бүлийн хүчирхийлэл үйлдсэн нь тогтоогдсон тул 13 настай А.Д, 5 настай Б.Х нарыг Хүүхэд хамгааллын 108 төвд хамгаалалтад авч, эх Т.А-г Гүнт-122 дахь саатуулах байранд саатуулжээ.

Албаныхны мэдээлснээр Т.А нь архины хамааралтай бөгөөд 2021 онд нэг, 2022 онд нэг, 2024 онд хоёр, 2026 онд нэг удаа нийт таван удаагийн худал дуудлага, мэдээлэл өгч, "нөхөр намайг зодсон" гэх үндэслэлээр цагдаад хандсан нь тогтоогдож, Зөрчлийн тухай хуулийн 15.9.1-д заасны дагуу тухай бүр арга хэмжээ авч байжээ.

Одоогоор насанд хүрээгүй хохирогч хүүхдүүдэд хууль ёсны төлөөлөгч томилж, хохирогчоор мэдүүлэг авах, сэтгэл зүйчийн үнэлгээ хийлгэх, нөхцөл байдлын үнэлгээ гаргуулах ажиллагаа үргэлжилж байна.

Мөн зөрчлийн хэрэг нээн шалгаж байгаа бөгөөд хэргийг 2026 оны наймдугаар сарын 3-нд шүүхэд шилжүүлэн эцэслэн шийдвэрлүүлэхээр ажиллаж байгаа аж.