17 хүүхэд төрүүлж өсгөсөн Тэс сумын хосын үр ачийн тоо 100 хүрчээ

Увс аймгийн Тэс сумын малчин Ц.Чойдон, Г.Сүнзмаа нар 17 хүүхэд төрүүлж өсгөсөн өнөр өтгөн гэр бүл юм. Өдгөө ная гаруй насыг элээж буй хоёр буурал саяхан ач охиныхоо хуриманд оролцож, үр хүүхэд, ач зээ нарынхаа хамт халуун ам бүлээрээ цугларчээ.

Тэдний 17 хүүхдийн 13 нь төрөлх Тэс сумандаа аав, ээжийнхээ ойролцоо амьдарч, боловсрол, эрүүл мэнд, мал аж ахуйн салбарт ажиллаж байна. Харин дөрвөн хүүхэд нь нийслэл болон бусад аймаг, суманд ажиллаж, амьдарч байгаа аж.

Хүүхдүүдийн хамгийн ахмад нь 61, хамгийн бага нь 33 настай. Харин хүргэн, бэр, ач, зээ, ачинцар, зээнцэрийг нь нийлүүлбэл энэ өнөр гэр бүлийн гишүүдийн тоо хэдийнэ 100-д хүрчээ.