Үндэсний аюулгүй байдлыг хангах хүрээнд салбар дундын ажлын хэсэг байгуулав

Хууль зүй, дотоод хэргийн сайдын өргөтгөсөн ээлжит бус шуурхай хуралдаанаар телевиз, радио, хэвлэл мэдээлэл, цахим орчин, сошиал сүлжээнд түгээж буй хууль бус, хортой агуулгын нөхцөл байдалд үнэлгээ хийж, төрийн байгууллагуудын хамтын ажиллагааг сайжруулах зорилгоор салбар дундын ажлын хэсэг байгуулахаар шийдвэрлэлээ.

Энэ үеэр ХЗДХ-ийн сайд С.Амарсайхан “Үндэсний аюулгүй байдал гэдэг нь зөвхөн хил, газар нутгийн асуудал биш. Иргэдийн төрдөө итгэх итгэл, үндэсний үнэт зүйл, хүүхэд залуучуудын хүмүүжил, гэр бүлийн тогтвортой байдал зэрэг нь тусгаар тогтнолын чухал баталгаа юм. Тиймээс мэдээллийн болон цахим орчны аюулгүй байдлыг үндэсний аюулгүй байдлын бодлогын тэргүүлэх чиглэл болгон авч үзэх шаардлагатай” гэдгийг онцоллоо.

Шинээр байгуулагдсан салбар дундын ажлын хэсэг нь хүүхэд, залуучуудыг хортой агуулгаас хамгаалах, үндэсний үнэт зүйл, өв соёл, оюун санааны дархлааг бэхжүүлэх, хүний нэр төр, алдар хүндийг хамгаалах, төрийн байгууллагуудын хамтын ажиллагааг сайжруулах чиглэлээр ажиллах юм.

Харин сайд С.Амарсайхан “Хууль бус агуулгатай тэмцэх нэрийн дор иргэдийн үзэл бодлоо илэрхийлэх эрх, мэдээлэл хайх, хүлээн авах, хэвлэн нийтлэх эрх болон хэвлэл мэдээллийн редакцын хараат бус байдалд халдаж болохгүй. Төрийн зохицуулалт нь үзэл бодлыг хязгаарлах бус, харин хуульд хориглосон үйлдэл, хүүхдийн эрхэд халдсан агуулгыг илрүүлж, таслан зогсоох, хууль зөрчсөн этгээдэд хариуцлага тооцоход чиглэнэ” хэмээн мэдэгдлээ.

Мөн хэрэглэгчийн мэдээллийн аюулгүй байдал, хүүхэд хамгаалал, насны баталгаажуулалт, эцэг эхийн хяналт, цахим платформын хариуцлага болон төрийн байгууллагуудын мэдээлэл солилцоог сайжруулах чиглэлээр хэрэгжүүлэх арга хэмжээний төлөвлөгөө боловсруулахаар болсон талаар Хууль зүй, дотоод хэргийн яамнаас мэдээлэв.