НҮБ-ын Цөлжилттэй тэмцэх конвенцын Гүйцэтгэх нарийн бичгийн дарга Ясмин Фуад Монголд ажиллаж байна

UNCCD COP17 бага хурлын бэлтгэл ажилтай танилцаж, зохион байгуулалтыг олон улсын жишигт нийцүүлэх зөвлөмж өглөө

НҮБ-ын Цөлжилттэй тэмцэх конвенцын (UNCCD) Гүйцэтгэх нарийн бичгийн дарга Ясмин Фуад Монгол Улсад албан ёсны айлчлал хийж байна.

Монгол Улс 2026 оны наймдугаар сарын 17-28-ны өдрүүдэд Улаанбаатар хотноо НҮБ-ын Цөлжилттэй тэмцэх конвенцын Талуудын 17 дугаар бага хурал (UNCCD COP17)-ыг зохион байгуулах бөгөөд энэ нь байгаль орчны салбарт манай улсын зохион байгуулж буй хамгийн том олон улсын арга хэмжээ юм.

Айлчлалын хүрээнд Ясмин Фуад бага хурлын зохион байгуулагдах талбай болон бүтээн байгуулалтын ажлын явцтай танилцаж, бэлтгэл ажил, дэд бүтэц, логистик, зочид төлөөлөгчдийг хүлээн авах зохион байгуулалтын талаар мэдээлэл авч, холбогдох албаныхантай санал солилцлоо.

Мөн хурлыг олон улсын жишигт нийцсэн, тогтвортой хөгжлийн зарчимд тулгуурласан "ногоон" зохион байгуулалтаар өндөр түвшинд зохион байгуулах, оролцогч талуудын үр дүнтэй оролцоог хангах чиглэлээр зөвлөмж өгсөн байна.

Тэрбээр Монгол Улс COP17 бага хурлын бэлтгэл ажлыг эрчимтэй, зохион байгуулалттай хэрэгжүүлж байгааг онцолж, Байгаль орчин, уур амьсгалын өөрчлөлтийн яам болон хамтран ажиллаж буй төр, хувийн хэвшлийн байгууллагуудад талархал илэрхийлжээ.

UNCCD COP17 бага хуралд дэлхийн 190 гаруй улсын Засгийн газар, олон улсын байгууллага, эрдэмтэн судлаачид, иргэний нийгэм, хувийн хэвшлийн төлөөлөл оролцож, цөлжилт, газрын доройтол, ган гачгийн эсрэг дэлхийн хамтын ажиллагааны дараагийн зорилт, бодлого, шийдвэрийг хэлэлцэх юм.