Англи Францыг 6:4-өөр хожиж, 60 жилийн дараа ДАШТ-ээс медаль хүртлээ

Майами хотод болсон 2026 оны хөлбөмбөгийн ДАШТ-ий хүрэл медалийн төлөөх тоглолтод Английн шигшээ баг Францыг 6:4 харьцаагаар хожлоо.

Тоглолтын эхнээс санаачилгыг авсан Английн багийн хагас хамгаалагч Деклан Райс 3 дахь минутад гоол оруулж, улмаар Эзри Конса 18 дахь минутад тоог нэмэгдүүлсэн. Харин Букайо Сака 37, 45+1, 87 дахь минутуудад гурван гоол оруулж, хет-трик хийсэн бол Жуд Беллингем 90+8 дахь минутад эцсийн цэгийг тавив.

Францын шигшээгээс Килиан Мбаппе хоёр гоол оруулж, ДАШТ-ий түүхэнд оруулсан гоолын тоогоор Лионель Мессиг гүйцэн 22 гоолтой боллоо. Мөн Брэдли Барколя, Усман Дембеле нар тус бүр нэг гоол нэмсэн ч Английн довтолгоог зогсоож чадсангүй.

Ингэснээр 1966 оны дэлхийн аварга Английн шигшээ баг 60 жилийн дараа ДАШТ-ээс медаль хүртэж байна. Түүнчлэн Англи-Францын 6:4 гэсэн үр дүн нь ДАШТ-ий хүрэл медалийн төлөөх тоглолтуудаас хамгийн олон гоол орсон тоглолт боллоо.

Харин Францын шигшээ баг 1998, 2018 оны дэлхийн аваргын цомыг хүртэж байсан бол энэ удаа хүрэл медалийн төлөөх тоглолтод ялагдал хүлээлээ. Дасгалжуулагч Дидье Дешам Францын шигшээг 187 дахь тоглолтод удирдсан бөгөөд ДАШТ-ий дараа багийг Зинедин Зидан хүлээн авах юм.