ХОВД: Эрдэнэбүрэнгийн усан цахилгаан станц 35 хувийн гүйцэтгэлтэй байна

Ховд аймагт шинээр барьж буй Эрдэнэбүрэнгийн усан цахилгаан станцын бүтээн байгуулалтын ажил 35 хувийн гүйцэтгэлтэй үргэлжилж байна. Төслийн ерөнхий гүйцэтгэгч "Пауэр Чайна" компанийн захирал Xu Shenfei тэргүүтэй ажлын баг энэ сарын 7-нд Ховд аймгийн удирдах ажилтнуудтай уулзаж, мэдээлэл солилцлоо. Төслийн талбайд одоогоор Ховд, Увс, Баян-Өлгий аймгаас 250 орчим иргэн ажиллаж байгаа бөгөөд цаашид орон нутгийн ажиллах хүчний оролцоог нэмэгдүүлэхээр төлөвлөжээ.

Уулзалтын үеэр Ховд аймгийн удирдлагууд бүтээн байгуулалтын ажлыг төлөвлөгөөний дагуу эрчимжүүлэхийн зэрэгцээ ажилтнуудын хөдөлмөрийн аюулгүй байдал, ажиллах орчин нөхцөл, нийгмийн баталгаа, цалин хөлсний асуудалд анхаарч ажиллахыг хүсэв.

Эрдэнэбүрэнгийн усан цахилгаан станц нь Ховд аймгийн төвөөс 85 км, Эрдэнэбүрэн сумын төвөөс 25 км зайд Ховд голын Шижигтийн хавцалд байрлана.

Уг бүтээн байгуулалт ашиглалтад орсноор баруун бүсийн аймгуудын цахилгаан эрчим хүчний хэрэглээг тогтвортой хангах, орон нутагт ажлын байр нэмэгдүүлэх зэрэг олон давуу тал бүрдэх юм.