ХАБ хангаагүйгээс үүдэн гурван хүүхдийн аав хорвоогоос явлаа

ХАБ хангаагүйгээс үүдэн гурван хүүхдийн аав 38 настай залуу эхийнхээ хэвлийд байгаа үртэйгээ үүрд уулзаж чадахгүй болж хорвоогоос явлаа…

Талийгаачийн төрсөн ах Д.Дашням: Гарын таван хуруу шиг эрхэлж өссөн дүүгээ амьдаар нь шороонд булуулчихаад, хөрсөн цогцсыг нь хүлээж авах үнэхээр хүнд байна

Зургадугаар сарын 29-нд Төв аймгийн Зуунмод хотод 38 настай эрэгтэй ажлын байран дээрээ шороонд дарагдаж, амь насаа алдсан харамсалтай хэрэг гарсан. Талийгаач нь аймгийн дулааны ерөнхий инженерийн харьяа Тантра Энержи ХХК-д ажилладаг байсан бөгөөд тус компани нь хөдөлмөрийн аюулгүй ажиллагааны шаардлага хангаагүй хүнд нөхцөлд ажиллуулжээ.
Тэрээр эхнэр, гурван хүүхдийн хамт амьдардаг байсан бөгөөд эхнэр нь долоон сартай жирэмсэн аж. Ар гэрийнхэн нь хайртай хүнээ гэнэтийн байдлаар алдсанд хүнд цохилтод орж, талийгаачийн ээж, аавын биеийн байдал ч хүнд байгаа талаар ярьж байна.
Мөн ар гэрийнхний мэдээлснээр осол гарснаас хойш компанийн зүгээс одоогоор холбогдож, тодорхой мэдээлэл өгөөгүй байна.