Х.Эрдэнэбулган: Өрхийн аж ахуй эрхэлдэг иргэдийг байгууллагуудтай хамтран ажиллах боломжийг өргөжүүлэх шаардлагатай

Монгол Ардын намаас улс орон даяар хэрэгжүүлж буй “Ардын нам-Ард түмэндээ” аяны хүрээнд Булган аймгийн Хангал суманд намын гишүүд, дэмжигчид болон иргэдийн төлөөлөлтэй уулзалт, ярилцлага зохион байгууллаа.

Уулзалтад Улсын Их Хурлын гишүүн Б.Баярбаатар, Булган аймгийн Засаг даргын орлогч О.Ундрах, СДМЭХ-ны Хойд бүс хариуцсан нарийн бичгийн дарга О.Үүрийнтуяа, аймгийн намын хорооны дэд дарга Т.Баярбат, Хангал сумын Засаг дарга Ж.Батдорж нар оролцож орон нутгийн нийгэм, эдийн засгийн өнөөгийн нөхцөл байдал, цаашдын хөгжлийн зорилт, мал аж ахуй, боловсрол, эрүүл мэнд, дэд бүтцийн салбарт тулгамдаж буй асуудлуудын талаар иргэдийн санал хүсэлтийг сонсон, санал солилцлоо.

Хангал сумын залуусын төлөөлөл Х.Эрдэнэбулган хэлэхдээ “Мал аж ахуй, газар тариалан зэрэг өрхийн аж ахуй эрхэлдэг иргэдийг байгууллагуудтай хамтран ажиллах боломжийг өргөжүүлж, заавал тендерээр бус шууд нийлүүлэлт, хамтын ажиллагааны механизмыг бий болгох шаардлагатай байна. Энэ нь иргэдийн орлогыг нэмэгдүүлж, орон нутгийн эдийн засгийг дэмжих ач холбогдолтой” гэж онцлов.

Мөн Монгол Ардын намын дарга, Монгол Улсын Ерөнхий сайд Н.Учралын дэвшүүлсэн Е4 хөгжлийн бодлого, “Чөлөөлье” үндэсний санаачилга, намын үйл ажиллагааны шинэчлэлийг дэмжих зорилгоор нэвтрүүлж буй Enam 3.0 платформын талаар танилцуулж, шинэчлэлийн бодлого, зорилтуудыг гишүүд, дэмжигчдэд дэлгэрэнгүй мэдээлэл өглөө.