“Их дуулга”-д олимпын аварга тав, дэлхийн аварга 25 жүдоч барилдана

Улаанбаатарын “Их дуулга”-д олимпын аварга тав, дэлхийн аварга 25 жүдоч барилдана

Олон улсын жүдо бөхийн холбооноос зохион байгуулдаг 2026 оны “Их дуулга”-ын тав дахь цуврал тэмцээн эхлэхэд хоёр хоног үлдлээ.

Монгол Улсын Ерөнхийлөгчийн ивээл дор болох энэхүү тэмцээнд таван тивийн 59 орны 461 жүдоч зодоглох бөгөөд үүний 257 нь эрэгтэй, 204 нь эмэгтэй аж. Одоогийн байдлаар Япон, ОХУ, Солонгос, Гүрж, Азербайжан тэргүүтэй 30 орчим орны жүдочид ирсэн бөгөөд Монголын жүдо бөхийн үндэсний шигшээ багийн зааланд бэлтгэлээ базааж байна. Монгол Улсад дөрөв дэх удаагаа болж буй “Их дуулга”-д олимпын аварга тав, дэлхийн аварга болсон 25 жүдоч барилдахаар иржээ. Хамгийн олон бөхтэй жин нь эрэгтэйчүүдээс 81 кг бөгөөд тус жинд 42 тамирчин барилдахаар бүртгүүлжээ. Харин эмэгтэйчүүдээс 70 кг-д 33 жүдоч бүртгүүлсэн нь хамгийн ихэд тооцогдоно.

“Их дуулга”-ын сугалааны үйл ажиллагаа “Новотел” зочид буудалд маргааш 13:30 цагт болно.

Ташрамд дурдахад, манай улс “Их дуулга” ангиллын тэмцээнийг өмнө нь 2022, 2023, 2025 онд зохион байгуулсан. Тэгвэл 2013-2016 онд гранпри ангиллын тэмцээнийг “Чингис хаан” нэртэйгээр эх орондоо хүлээн авч байв.